沪剧传统大同场戏《陆雅臣-逼瑚珠》

沪剧传统大同场戏《陆雅臣-逼瑚珠》

根据1957年王筱新、沈筱英演出录音记录

王筱新饰陆雅臣

沈筱英饰罗秀珍

罗：啥人啊？

陆：我呃！

罗：来朝噢。（罗秀珍开门，胡琴仿拉开门声。）

陆：勒辣开扇门死样怪气啥个事体！叫侬……

罗：相公啊，转来（什啊）。

陆：（极大声，带怒气地）哎！关起来啊。

（罗秀珍关门。）

陆：哪哼？哪哼？哪哼迪个死人关扇门僵发僵发，僵尸！

罗：哎呀，关门末当然迪能，哪能关法仔？

陆：（苶呆状，学罗秀珍）关门末当然迪能，哪能关法仔？呒没苗头个，关扇门末（啊带扎搭，别，迪。）（陆雅臣关门。）

罗：迪个算啥，花头大来西啊？

陆：（喃喃自语地）花头大来西！活活要死快哉，差弗太多。

罗：（叹气）嗯！

陆：侬气多叹叹噢！

罗：做啥？

陆：别人家男人转来末总快快活活，看见我男人转来末常照只面孔像拓啥浆糊，板到迪个一日！

罗：奈我笑弗出末哪能弄法呢？

陆：（个）譬如弗如末也好笑个呀。

罗：（个）有笑呒笑啥个快活呀？

陆：笑笑末肚皮也饱点哎。

罗：啥有笑呒笑肚皮会得饱啊？

陆：（煞有介事地）哼嗯！

罗：侬个下作胚哪能想出来啊？

陆：男人转来掇只凳子我男人坐坐，摆点规矩出来。

罗：穷来迪能搭啥个穷架子啦？

陆：穷末穷，架子要搭个。（提高声音）去倒碗茶出来！

罗：哎呀，饭也呒没吃，啥地方来茶啊？茶叶老早呒没啦哉！

陆：啥个旧年正月廿八买辣廿钿茶叶吃到奈完结（咂）？

罗：正月廿八吃到奈侬算算看几花日脚哉，啥地方来啊？
陆：侬哪能吃法介？

罗：（个）茶叶末捞一把咾。

陆：（个）人家弗穷穷啥人家？茶叶茶叶末搽个叶把哎！

罗：哦哟，个末侬还是吃吃白开水伐。

陆：随便伐，弄眼来吃吃。

罗：伙仓弗开，来得汤灌水也呒没，我到隔壁头去讨好伐？

陆：（生气地）嘴巴干煞哉。僵尸，真个僵尸，夫妻缘分满仔看见仔戳心戳肺戳肚肠个喏哎！新婚夫妇是看见仔开胃口。

罗：侬勒讲啥？吃茶喏。

陆：（蔑视地）规矩弗懂个喏。哼，（苶呆状，学罗秀珍）吃茶喏。

罗：哪能吃茶有规矩啊？

陆：叫应一声，我来教侬，死人。

罗：啥规矩我真弗懂呀。

陆：迪个末男人转来末待夫之职第一要紧。一碗茶末什梗样子一拿末喏，（将茶杯托于手心）奈末走出来喏。（学旦角身段、中州韵念白，用小嗓。）啊，相公回家，相公用茶吧……（面朝观众）做弗好。罗：唉，看侬啊，勒辣做精到怪，做点啥名堂呀！吃茶末吃仔眼末好哉。

陆：（苶呆状，学罗秀珍）啥个……哟吃茶……规矩一眼呒没，重新来过！也要照我能个小喉咙个。

罗：装弗来个，（将茶杯放于陆雅臣手心）喏。

陆：（学旦角身段、中州韵念白，用小嗓。）啊，相公回家，相公用茶吧……

罗：伲屋里好出身咾，迪种呒没学过歇呀。

陆：学学末会哉，迪趟饶仔侬，下趟要学噢。（面朝观众）亻那 看起来要学伐？一定要学个。

罗：学点啥呀。喏，奈冷脱哉噢。

陆：唉！气煞，哎，弗懂规矩，弗懂规矩。搿个男人（啦）还有搿个脑筋（啊）去做啥生意去。

罗：啥规矩呀？（递过拿杯）

陆：弄得什梗样子个腔调。好什，摆好，摆好，摆好。唉，只潮烟筒勒辣伐？

罗：潮烟筒勒辣呀。

陆：烟有辣伐？

罗：烟老早呒没辣什。

陆：呒没我赌场里抓着两只蹔蛭辣。

罗：唉呀，蹔蛭要咬个呀，哪能吃发呀？

陆：（无奈地）香烟头！

罗：陆家个大少爷辣拾香烟屁股吃啊。

陆：唉！

罗：阿要坍台啊！

陆：香烟头好货，样样香烟侪有个。

罗：噢？真个啊？

陆：唉，卷辣个香烟来得个崭。

罗：我去拿噢。

陆：（叹气地）唉，嗯……

罗：唉，饭呒没吃搭穷架子。

陆：穷末穷总是一个男人呀。男人转来总要迪眼花头够得到。

（罗秀珍拿出烟筒）

陆：吹吹炀啊！

（罗秀珍吹烟筒）卟卟

罗：吹弗炀呀。

陆：唉呀呀，死人额骨头，死人额骨头，吹个（渍测）也吹弗炀。

罗：搿哪能吹法啊？

陆：吹渍测末有门槛个，要吹天官赐福个福字。

罗：要吹福个啊？

陆：唉，吹福噢。福，会吹伐？

罗：（对着烟筒）福……弗炀嘛。

陆：（笑）嘿嘿嘿嘿嘿嘿……弗是喊侬声音出来呀。

罗：哪能啦？

陆：（吹烟筒）天官赐福。喏喏喏喏……

罗：点出来。

陆：哎哎哎哎哎哎……阿炀辣哉。

罗：奈哪能啊？

陆：奈来来来，脱我接一接。

罗：点辣是伐？（罗秀珍点烟筒）

陆：嗯。（随着罗秀点烟速度的快慢，故意将头靠近烟筒有明火处，佯装烧到自己。）噢哟。

罗：（惊慌地）噢哟。

陆：好好好。

罗：做啥啦？啥体啦？

陆：好，哼，好。

陆：侬是叫花子拆屋里，干弗出好事体。迪个火有名堂哎，叫吊乌龟线！啊，一眼眼，一眼眼，拿来引过去，搿个烟筒子戳辣我喉咙头，戳煞仔末清爽点侬好嫁人去哉是伐！（打一记罗秀珍。）

罗：啊哟哇，罪过个，我蛮好点末，侬做啥一眼眼候过来呢？

陆：吊乌龟线！覅触祭哉！嗯！迪个心，心已经变啦哉。

罗：我问侬啊，奈还有啥做伐啊？

陆：有啥勒做，呒啥做哉。

罗：呒啥做我倒问侬。

陆：侬辣当我猪头三用，仏（音）？

罗：啥弄出猪头三来？

陆：哼！

罗：既然侬呒没事体做，我倒问侬。姐妹拿来两块洋钿，叫侬买柴粜米，哪能空手转来，两块洋钿呢？

陆：（打一记罗秀珍）弗提起两块洋钿倒罢哉。

罗：提起呢？

陆：侬堤起两块洋钿，我恨尽八骨。

罗：要末恨尽切骨。

陆：多骨一骨。

罗：啥个意思啊？

陆：哼，拿来两块洋钿是铜个。今朝用铜洋钿，明朝用铜洋钿，私开炉灶，该当何罪，拿我抓仔进去杀仔头，侬亦好嫁人哉，阿是？

罗：唉，罪过个。

陆：罪过？

罗：难道同胞个手足伊拨辣我个铜钿，会得拨我铜洋钿吗？

陆：哎！

罗：好个，侬拨辣我，我到娘家去调。

陆：奈亏得我人缘好咾带脱哉。

罗：阿是真个啊？

陆：嗯。

罗：带脱是再好弗有，阿是带辣米庄浪？

陆：米庄浪迭个洋钿弗好用。

罗：钱庄浪？

陆：钱庄浪用弗进。

罗：典当里？

陆：到赌场里去，买仔盐津豆吃哉。

罗：赌场里有盐津豆啊？

陆：哎。

罗：两块洋钿盐津豆侬吃辣要咸煞哉！

陆：哎，只有四粒，上头一只盅子下头一只盆子，当中四粒骰子，嗟子嗟子，要末弗着，着浪三寸换一尺，要想赢咾去赢脱哉哎。

罗：唉呀，迪能讲起来，侬亦去输脱。

陆：赢脱个。

罗：当真输脱。

陆：要想赢别人家咾赢脱个。

罗：唉，【起腔】侬掰只赖料胚……（陆雅臣欲打陆秀珍）（白）哎哟哇，亦要打着伐。

陆：亦要哭咂？侬啥个开心？（哭音）断命哭啊！眼泪噶多啊！拿眼泪脱我塞进去！

陆：要末揩脱，哪能塞得进呢？

陆：塞进去！覅哭！

罗：（叹气地）唉，【起腔】像（个）买仔鲤鱼干放生，弗晓娘子家中死（咾）活（啦），
（长过门）

陆：啥个开心，还要（学罗秀珍唱腔）活（啦）。

罗（唱）：【长腔中板】我伲同胞妹妹到此来望望我，拨我两块洋钿过光阴。出门辰光我离步千叮嘱，我叫丈夫（是）买柴粜米回转门。谁知晓侬（呀）花（恐系口误，应为柴。）弗买（来）米弗粜，输得两手空空回转门。屋里厢（是）灶前缺少油盐米，弄得灶后头柴茅呒半根。【甩中板】我要问丈夫，搭侬妻在家（哪哼）活命？
（此时陆雅臣正打瞌睡。）

罗：问侬两块洋钿输脱哉，奈哪能弄法？哎！（此时陆雅臣突然惊醒，嘴里发出声音，像在吃着什么。）辣吃啥？

陆：人家齐巧辣吃只炒鳝糊，啊，一炒炒进去，拨侬断命个拿我瞌冲鬼也弄脱。

罗：啥侬辣吃炒鳝糊啊？

陆：哎！侬啥个事体啦？

罗：问侬两块洋钿输脱，奈哪能过日脚呢？

陆：洋钿输末是输脱哉呀。

罗：哪能办？

陆：侬搭我讲末我去脱啥人话呢？

罗：搿么当然我要搭侬讲个咾。

陆：哟，奈侬坐一歇歇，输末是输脱哉。

罗：（叹气地）哼嗯。

陆（唱）：【起腔】夫妻活性命只要商（啊）量（啊）过（呃），（长过门）【长腔中板】侬快快活活过时日，气气闷闷一定要成功（啊）病，（罗秀珍白：奈哪能办法？）倘然三长两短（个）身体气坏脱，【甩中板】男人心里要弗放心。（罗秀珍白：侬少打打油扎来哦，覅肉麻当有趣。）【起腔】侬邻舍隔壁交关好，（罗秀珍白：邻舍啊？）（长过门）【长腔中板】侬走出去东面妈妈叫，西面叫婶婶，（罗秀珍白：做啥？）妈妈屋里柴去借个仨四捆，（罗秀珍白：去借？）婶婶屋里米借个仨五升，【甩中板】烧好仔，热吹铺烫能够大家吃一顿。

罗（唱）：【起腔】侬为啥梗里弗着糯里着，（长过门）【长腔中板】早已晓得侬（是）动弗出啥好脑筋，侬叫我要到外头去，搭邻舍人家叫章程。（陆雅臣白：哎。）教侬回头也要搭我论一论，（陆雅臣白：论啥？）我辣妈妈屋里柴（末）借过好几捆，婶娘家庭里，米（末）借过好几升，常言所说（是）借借还还家家有，侬（个）男人弗张气（末）只借弗还啥人肯？我呒没迪只面孔末事借，【甩中板】教侬要借柴米自上门。

罗：借弗着。

陆：搿末求人不如求自己。

罗：侬再想想办法看。

陆（唱）：【起腔】侬遐个钥匙交待我（呃），（长过门）【长腔中板】箱子里单个夹个皮个克两升，到典当里去当脱仔，【甩中板】回家转来（末）能够夫妻活性命。

罗（唱）：【起腔】侬突然（末）亦要问我当头寸，（长过门）【长腔中板】让我（是）自摸胸膛论一论，我娘家罗氏门中好出身，到夫家屋里（末）皮箱倒有三十六只，只只箱子碰箱顶。布糙衣裳弗要说（末），绸缎皮货几百升。（陆雅臣白：是个。）最差滑呢浅盒子，珍珠玛瑙倒有论半升。拨辣赖料弗争气（未），每天拿进店当门。连得当脱当头也弗算数，箱子浪个铰链撬下来，要到铜匠店里份量称。前两天夫要钥匙我弗愿，今朝侬要我钥匙噢声能。教侬辣旁边等一等，（走入房间）让我要到房间里厢看分明。勒辣旁边拿出仔青铜钥匙三十六，我将钥匙掼勒辣尘埃地，（将钥匙掷于地）【甩中板】教侬要多要少自家寻。

陆（唱）：【起腔】伊恘做恘（末）夫妻到究一只床浪人（长过门），【长腔中板】一说钥匙噢声能，【甩中板】要拿当头自家去寻。（罗秀珍白：多拿点哦。）【起腔】我（末）开出箱子眼门前（啊）看，（长过门）【长腔中板】好好交短衫裤子呒一身，【甩中板】侪是许许多多（个）破条巾。【起腔】匙钥我来还拔侬，（罗秀珍白：我覅。陆雅白：啥覅？）（长过门）【长腔中板】哦哟想着哉（末）拨我雅臣当干（啊）净，（罗秀珍白：本来当光啊哩。）侬来坐一歇，（罗秀珍白：我覅坐。）我来想才情。想着哉，侬到娘家屋里去走一埭，看见亻那个姆妈，假仁假义（是）假伤心。（罗秀珍白：到娘家？）姆妈啊，我苦煞哉，伤心哎，伲个雅臣弗争（啊）气，（哭音）（罗秀珍白：做啥？侬哪能？）现在吃着弄来难活命，雅臣现在（末）收心转，两个朋友介绍伊做生意经，（罗秀珍白：噢。）赚起来五六十块洋钿拿得稳，（罗秀珍白：做啥生意啊？陆雅臣白：哎，做交易所生意去。罗秀珍白：做回侬交易所生意。）奈末亻那个娘，伊话弗要紧（咾）弗要紧，奈末侬，铜钿借，好好交行头去翻两身。赚点铜钿回家转，加利奉还送上门，我辣说，侬辣听，【甩中板】娘子赞成（呃）弗赞？

罗（唱）：【起腔】晓得侬迪只赖料胚，（陆雅臣白：去调枪花。）（长过门）【长腔中板】哪能壳张侬（末）叫我要到娘家门，谅来侬也是个明白人，我伲爹爹老早死，母亲好弗容易（末）女当男权辣过光阴，拖大我伲姐妹两个人。（陆雅臣不以为然地白：嗯。）人家老古所说是做做吃吃家家有，哪怕是坐吃海干山要平。我到娘家（是）话个弗借常照借，但是话个弗拿时常上她门。借过当头合过会，并弗有一票还上门。母亲是前门弗有（啥）摇钱树，我伲老孃家（末）后门弗有聚宝盆。像（个）雪山造桥能容易，挑个雪来填只井，填死填煞填弗平。贴煞侬迪个赖料也弗会得好，带累我伲娘家也要贫，【甩中板】侬要铜钿我弗答应。

罗：侬自家去。

陆：噢，娘底头借也借过，拿也拿过，侬呒没面孔去啊？

罗：时常去问姆妈借，也讲弗出个呀，噢。

陆：呣。对个，对个，对个。

罗：搿末侬弗太去个，侬去借伐。

陆：好极哉，好极哉。

罗：好伐？

陆：侬覅惹我男人勿转来咾。哼哼。

罗：哎呀，我真隔夜饭也吐出来，侬弗转来是随便侬伐噢。谢谢一家门。

陆：隔夜饭吐出来是侬胃口弗好啦呀。哼哼。

罗：呣，三日天饭也没吃咾，啥个罢侬弗得弗转来啊

陆：搿末侬去呀，去仔末我拿样转来。去呀，去呀。

罗：覅肉麻当有趣，拿样转来，啥人要侬转来过呀。

陆：去呀，伊拉娘。

罗：啥人家娘呀？

陆：弗曾养啥，只好喊伊拉个娘。去呀，去呀。

罗：花头花脑末伊拉个娘咾啥咾，我弗去。

陆：男人个闲话听点，去呀，去呀，去呀。

罗：覅呀！侬去好什。

陆：夫妻道理末有啥呢？去呀，去呀，去呀。（笑）嘿嘿嘿嘿。

罗：我弗去呀，要末侬……

陆：姆妈交关欢喜侬哪，侬话现在雅臣末收心哉，有个朋友末介绍伊去做生意，奈末身浪弄来一塌糊涂，好好交翻眼行头，让伊……

罗：我讲拨侬听，姆妈末欢喜侬个，女婿像伲子一样个，侬去借噢，去呀。

陆（唱）：【起腔】我去（末）好像难为情，（罗秀珍白：搿末我也难为情个呀。）（长过门）【长腔中板】伊横弗肯来竖弗肯，让我雅臣还要来想才情。还有两粒（个）瑚……瑚……（罗秀珍白：阿是瑚珠啊？）瑚珠宝和珍，（罗秀珍白：哼，瑚珠哪能啊？）一粒瑚珠侬囥好仔，一粒（个）瑚珠（末）交待陆雅臣，（罗秀珍白：做啥？）（个）典当里五六十块洋钿拿得稳，（罗秀珍白：亦要当什啊？）一半侬开伙仓，活性命，一半让我走进赌场（啊）门，早也赢（咾）夜也赢，陆雅臣原旧一个发财人，【甩中板】侬个心里哪哼光景？

罗：（唱）【起腔】侬为啥（末）专门要动坏脑筋，（长过门）【长腔中板】别样都弗想，侬要两粒瑚珠宝和珍，（陆雅臣白：哎。）它是无价国宝价值连城。（陆雅臣白：是呀。）两粒瑚珠外婆传娘娘传囡，三代弗进店当门。（陆雅臣白：嗯。）我伲同胞妹妹到此来望望我，她拨我（是）两块洋钿过光阴。（陆雅臣白：是哎。）她有意（咾）我有心，我两粒瑚珠顺手交拨伊，（陆雅臣惊诧：啊？！）叫伊带回到娘家门。（陆雅臣惊诧：噢？！）因为一粒瑚珠母亲年纪大，人老好像风前烛，她是今朝弗晓得明朝人。只道老孃家有啥百日归天去，勒辣帽子浪厢钉一钉，表表小辈一点心。还有一粒瑚珠宝和珍，我伲同胞妹妹今年十七岁，蛮长大（咾）蛮长成，只道有机会她要门当户对配婚姻。侬个赖料姐夫人情送弗起，（陆雅臣生气地白：好极哉！）做姐姐（个）瑚珠权当薄人情，【甩中板】早已经拿到娘家门。

陆：两粒瑚珠，亻那 个姐妹拿到娘家去什啊？

罗：对个。

陆：【起腔】到我姐夫屋里来偷末（啦）事，（长过门）【长腔中板】好戏咾，我家人家穷得来什梗快，（罗秀珍白：罪过个噢。）【甩中板】拨亻那早早夜夜偷干净。

罗：迭个两粒瑚珠是伲娘家个呀。

陆：一粒瑚珠拨亻那 娘年纪大哉，将来死起来末阴间路浪当行灯。

罗：小辈个心意。

陆：两个叫花子死辣阴间去，辣暗途里厢摸个。是伐？

罗：哎呀，迪个弗能钝个呀。

陆：亻那 娘健来。

陆（唱）：【起腔】连得老虫打搭（辣）煞，（罗秀珍白：要么老虎打搭煞。陆雅臣白：老虎覅吃脱噶？）（长过门）【长腔中板】搿种死活东西啥要紧？还有一粒姊妹将来攀起亲，要做薄人情，亲也呒没定，【甩中板】搿种豆腐皮（个）人情啥（个）要紧？

罗：罪过个，侬哪能迪能样子啊。

陆（唱）：【起腔】（叫）老实说侬瑚珠拿得出也罢哉，（罗秀珍无奈地白：拿弗出呀。）（长过门）【长腔中板】拿弗出讲出个闲话我要弗好听，（罗秀珍白：啥个说话啊？陆雅臣狠狠地白：哼哼！罗秀珍白：哼哼啥？）（陆雅臣欲言又止，躲闪一旁，羞涩而犹豫地以袖遮脸。）【甩中板】陆雅臣（末）卖大娘子难（个）为情。

陆：去呀，覅，覅瞎讲，去拿岀来，去呀。

罗：弗骗侬个呀，真个拿去辣什。

陆：覅厚滋讷嘚好伐？

罗：啥人搭侬厚滋讷嘚呀。

陆：一个人末爽快点，去拿来。

罗：伊拨我两块洋钿末，我顺手两粒瑚珠交拨伊，带到娘家去什。

陆（唱）：【起腔】牛皮糖米疑仔戈仑吨，（长过门）【长腔中板】拿得出（是）弗要紧，拿弗出，（陆雅臣白：哼哼！罗秀珍白：哼哼啥？）【甩中板】卖脱侬只堂客败家精！

陆：（破釜沉舟地）卖脱侬！

罗：（唱）【起腔】（只）赖料竟然讲出无理话，（长过门）【长腔中板】侬讲拿得出（个）瑚珠饶恕我，（说）万事全休百太平。（陆雅臣白：嗯。）假使我两粒瑚珠拿弗出，侬要卖脱我只八败命。无事端端将妻卖，难道我有啥错事情。弗是侬面浪厢夸大口，娘家（末）罗氏门中好出身。出家要到夫家离家庭，（陆雅臣白：哎。）虽则我现在穷（咾）苦，秀珍人穷志不贫，（陆雅臣白：哦？）我到夫家屋里厢前门阿有进和尚？后门可有出道人？坏脱一个知县犯十三条款，阿有七出之条落辣侬（个）人眼睛？（陆雅臣白：哼哼哼哼。）侬无缘无故将我卖，今朝（是）还我赃（咾）还我证。侬（是）万事全休百太平。假设赃证还弗出，我有气耐侬一黄昏。明朝天亮要到娘家去，叫高堂母亲搭侬评理性，【甩中板】我看侬（还是）坐得正（呢）立得稳。

陆（唱）：【起腔】搭我花烛男人道理讲，（罗秀珍白：侬讲呀，我有啥个错事体？）（长过门）【长腔中板】侬要叫我还赃证，【甩中板】侬个赃证倒有一大捆。

罗：我有啥个赃证侬讲讲看。

陆（唱）：【起腔】侬第一桩，弗孝顺公婆为第一。（长过门）（罗秀珍白：死也死哉，我哪能孝法？（陆雅臣白：也好孝孝个。）【甩中板】第二桩（末）常常欺瞒我陆雅臣。（罗秀珍白：罪过个，侬辣打我呀，我几时欺瞒侬拉？）

陆：第三桩啊，侬嫁过来到奈阿曾养啥？

罗：养弗出呀。

陆（唱）：【起腔】养囡弗出吃白（啦）食，（长过门）【长腔中板】将来要害伲陆家绝子（啊）孙，弗曾讨侬个辰光赌起铜钿常常赢，讨仔侬只败家精，【甩中板】一家人家赌干净。（罗秀珍白：迪个侬去赌末，哪能怪我呢？）【起腔】侬像朱买臣（个）娘子崔氏（啊）女（哎），（长过门）【长腔中板】要犯八败扫帚命，拿侬休脱仔，我四品黄堂能够坐嘉兴，像姜太公娘子马大（啊）姐，要犯（个）八败扫帚命，拿侬休脱仔，我八十岁遇着（个）文王紫薇（啊）星，今朝我来问声侬，（面对罗秀珍蛮横无理、咬牙切齿地：哼哼！）卖得成功卖弗成！

罗：（唱）【起腔】今朝侬咬牙切齿盯牢我，（长过门）【长腔中板】但是我见他现在赌铜钿（咾）目前真赌昏。抱定宗旨卖女人，我横竖活辣屋里无好日，我常照拨侬（末）早一顿（咾）夜一顿。让我要到里厢去，悬梁高挂死路寻，【甩中板】让侬活人弗卖卖死人！

陆（唱）：哎！【散板】伊到里厢去寻死（啊）路（呃），让我豪燥点束腰带解一根（啊），要扳仔搿只堂客就出（啦）门，慢说我妻到里房去哎……

说明：该版《陆雅臣-逼瑚珠》与现行版本有较大不同，颇具老滩簧的“路头戏”风格和特色，语言生动俚俗，保留了一些坊间市井的俗语俗谚，较接近该剧的早期原貌。王筱新、沈筱英二位前辈早在二十世纪三十年代已有合作，从该录音听来，二位的合作越发默契，表演时有来有往，人物的几番交集“扣”得相当“牢”。现场效果极佳。其中，尤以王筱新先生的即兴表演最为突出。故此，该版的说白几近现行版的一倍。如“吃水烟”、“开箱子”等均为现行版所无。更值得一提的是，演出中王筱新先生的演唱保持了其一贯的东乡调风格，乡音浓郁，极富生活气息，这在当时的沪剧界几乎可称绝无仅有。他还表演中还模仿旦角之身段及白口，盖因其早年的“扎头髻”功底扎实。沈筱英先生的表演沉稳，唱腔亦保持了早期的滩簧韵味，听来软糯流畅，自然亲切。总之，该版录音从各方面为我们展现了《陆雅臣-逼瑚珠》早期滩簧演法，为不可多的绝品。

在记录的过程中，虽然对照相关资料，对录音内容反复听辨，但于由本人水平有限，定有疏漏讹误之处，恳请方家指正，不胜感激。