珍珠塔·婆媳相会

珍珠塔·婆媳相会（第六回）

表演：周云瑞、薛筱卿

（表）白云庵慈航高阁，婆媳穿帮。老太太听见外甥囡娪回转去要寻着王本老家人，说俚吞没礼物、捏造假书信。老太太想王本是，格个老总管我晓得，忠厚老实，从前伲方家里格总管，该封信呢，是假格，但是格封信决计勿是俚一倌子假造，一定替嗯笃爷商量好格。啥道理么，俚乃河南回到襄阳么齐巧倷毛病顶顶重格辰光，郎中才回头了，倘使讲清爽表弟舅娘才勿看见，倷格毛病还会好格啦？倷是心病，心病还将心药医么，所以造一封我伲子格假信，总另外放开勒浪。覅倷回去王本吃夹当，让我来说说清爽，带道呢，安慰安慰外甥囡娪。
方太太：啊，贤甥，想这一封假书信，照我看来么——
陈翠娥：呃，是。
方太太：（唱）或者是娘已出门儿再返。
（表）刚刚为仔要讲穿格封假信格辰光一样一句闲话，老太说格是“娘已出门儿未返”，娘么出仔门哉，伲子么朆转来，格么格封信是假格。现在俚已经晓得则，格闲话勿能够诚望推车上壁，覅外甥囡娪伤心过头，人昏倒，要还人命格！所以闲话呢，要说活络点格，世界天浪事体说勿定该，作兴我娘么倒出门，伲子齐巧转来呢？格么王本碰着我伲子，拿着我伲子封信，匣作事格。
方太太：（唱）王本是也未可知见主人，小儿是的的居然写一音。
（表）就算格封信是假格么。（白）呶——
（唱）倘然说尔的表弟舅娘都不见，只怕你病中人增重倒不能轻。谅必他先与尊翁商量久，把假书信重又安慰你病中人。
王本是义胆忠肝年老仆，数十余年直到今， 他暗算阴谋从未曾。
（表）倷说转去要寻着俚，啥勒送到俚衙门里办。（白）断断使不得！
（唱）我劝你休造次，好章程，倒不如唤一唤苍头待我来问一问明。
（白）不要管这封书信是真是假，你回转府上，命王本到此，待我当面问他，也就是了。
陈翠娥：噢，是。
方太太：（表）叫得倷喊俚来。老太实在俚格打算是啥？等到王本来我问清爽，倒底格封信是真格假格，我伲子倷阿曾碰着。如果俚说是朆碰着，格封信是假格，格么我伲子啊，今世勿会见面则。我登勒该搭庵堂里向匣呒啥巴望，我再寻一个聚会，再去自寻短见算则。所以老太格性命预备等王本来定夺则。正勒浪该格辰光么，下头倒声音来则。下头哪哼会声音来呢，两个丫头拔勒格二师太去揎上来格。二师太等等半日勿下来么，刚刚到慈航阁格二层楼听壁脚，听听么勒浪哭，要闯上来么勿敢，那么俚勿敢上来么，想还是去弄两个丫头上来。两个丫头听见小姐勒浪哭么，想勿知啥，别样呒啥，小姐毛病刚刚好，格位老娘娘是河南人，覅讲仔小姐姑爷笃啥格事体。小姐病后娇躯，伤心过头要出事体。所以四个丫头么亦然到慈航阁格二层楼，一看三层楼格门关勒浪，勿敢闯上来，登勒扶梯浪喊。
丫头：格个，小姐，下来噢！
丫头：小姐，下来噢！
丫头：素斋端正好哉！
丫头：蛮准，下来吃素斋吧！
丫头：喔，用素斋！
丫头：冷脱仔勿好吃格呀！
方太太：（表）啊呀！老太一听勿绝则，丫头勒浪下头催则。的确，伲勒浪上头糊里糊涂，我替外甥囡娪讲话格辰光蛮多则，别人家要起疑心格！哪哼格庵东家么替格佛婆恁格谈得落？格个里向一定有道理。一疑心啦，伲两只面孔才哭得来，下去别人一看就是。多一个人晓得，多穿帮，我就难为情。要拿外甥囡娪搀起来，外甥囡娪跪勒地浪，随便哪哼勿肯起来。硬紧拿俚搀起来。（白）啊，贤甥！下面丫环在那里催促了，倘被她们闯到楼头，看破机关，不大稳便，起来吧！
陈翠娥：噢，是。
方太太：（唱）她含悲扶起贤甥女，与她代把鲛绡揩泪痕。
（表）拿块绢头搭俚揩揩眼泪。
（白）贤甥请坐。
陈翠娥：噢，是。（表）听见格班丫头浪喊是，俚恨哦！哪哼可以呢？拿舅娘掼勒庵里，决计勿可以！我要请舅娘一道进城。（白）呃呀，舅娘啦！
方太太：贤甥！
陈翠娥：（唱）甥女儿火速归家内，立刻安排轿一乘，
负疚一诺进城门。
庵堂冷落难容息，佛地凄凉不可存。
要留顿甥女闺阁里，可以朝朝暮暮请安宁。
（白）还请舅娘应允了吧！
方太太：（表）一听，外甥囡娪阿要好？刚刚婆媳朆穿帮格辰光俚就说格，要拿我接进城，承欢尽孝，代替我伲子孝顺我。我阿要跟倷去呢？我覅去。哪哼好去呢？一来，嗯笃娘势利，我伲子上门尚且要势利出来，我什梗一个穷老太婆到嗯笃门浪，嗯笃娘会得欢迎噶？何必自讨呒趣呢？再者，到仔嗯笃屋里向，我看见倷标标致致外甥，贤惠新妇，我要想起自家伲子死勒强盗手里，加贰要伤心。看见嗯笃荣华富贵，想起自家从前格门第，匣要难过，反而要多哭两场。倒还是登勒师姑堂里向，搭两个师姑伴伴，大家孤单零零，倒勿觉得寂寞。格么哪哼呢？闲话说得婉转点，婉言谢绝。（白）贤甥，承蒙你一片美意，然而杨氏么——
（唱）我要在紫竹林中求大士，在那金莲花下来拜慈云。
但愿我儿尚在世，敲鱼念佛诵心经。
这佛门光大容留我，我要暮鼓晨钟了此生，
久盼老死在庵门。
（表）倘使我伲子勿来呢，我就登勒庵堂里向以修修来世。来格机会阿有？只有一个机会，除非我伲子勿死来则。呶，我带仔伲子再登门。虽然事实浪向是俚笃娘势利我伲子，但是讲起来呢，应该我带伲子到嗯笃府浪来，搭姑娘赔罪。
（唱）小儿有日能相见，来拜见姑娘领罪名。
不幸小儿谋命死，方家从此绝儿孙，
我老命应该如此形。
（表）伲子来，匣真正叫梦想罢则，看上去是勿会来则。（表）说到该格浪么眼泪漱落落。（白）可是啊？
陈翠娥：（表）叫小姐哪哼回答呢？当然是娘勿好落，势利表弟，以至于表弟负气而归，中途盗，死勒强盗手里。才是害勒娘手里。格么我阿要讲，舅娘倷覅气哦，伲娘是勿好！决计勿可以什梗讲法，格么我梗梗说，噢，是表弟勿好，得罪伲娘！想想表弟死阿已经死哉，还要喊俚担个错，格是象煞勿对。什梗勒想仔半日呒拨闲话讲，只好推头一声，因为娘多吃仔酒勒吃醉，只有什梗说法。（白）呃呀，舅娘啊！
方太太：贤哉，怎样？
陈翠娥：（唱）家母是醉后糊涂方寸乱，片刻工夫酒已醒。
过后方知情理欠，也只情理欠三分，
追悔无穷懊悔深。
要垂怜甥女三分意，更看家严一点情，
十分气恼要九分平。
（白）还请舅娘要恕罪！
方太太：（表）外甥囡娪阿要有青头？俚勒浪婉言代表娘勒浪赔罪。然而呢，我总勿希望再到嗯笃府浪去。
丫头：（表）正勒浪该格辰光么，下头丫头倒又勒浪催则。（白）咦，小姐下来啊！
丫头：哪哼再勿下来呀？
丫头：素斋冷脱仔勿好吃噶！
丫头：啊呀，倷勿下来伲要上来则！
方太太：（表）啊呀，老太想勿灵则，格上来是越加勿象样。倷看让，佛婆倒坐勒上首，庵东家么坐勒下首。两只面孔么才是哭得来，眼泡肿勒海。拨勒师姑、丫头晓得，我又要坍台。（白）啊，贤甥！倘被她们闯到楼头，看破机关，成何体统？（表）照道理么我搭倷讲勿完格闲话，然而现在贫富不同，只好倷管倷去。（白）贤甥，你就去吧！
陈翠娥：嗳，哎！（表）啊呀，小姐恨噢！恨啥？恨格班丫头！喤朗喤朗，快点下来，吃素斋。我替舅娘刚正碰头，闲话朆讲几句，马上分手，我哪哼舍得呢？什梗格班丫头顶顶可恶。
（唱）惹嫌的青衣几度请，再三催促下楼坪。
罗巾拂，羽扇擎，相逢不忍便离分。
（白）呃呀，舅娘啦！
（唱）想你舅母在庵中要宜珍重，风霜劳顿的老年人，
起居饮食自留心。
天公不负忠良后，遇难呈祥保太平，
他归家不见你白头亲，向襄阳也要把娘寻。
她是走一步，劝一声，自家泪眼未曾停，
整个泥人劝木人。
（表）小姐格辰光顶顶悲伤，自家心里难过得极，顶好别人去劝劝俚，倒说俚还勒浪劝格舅娘，一哒路走，一哒路劝，慢慢叫走到扶梯边浪，一层，一层勒浪走下去。
方太太：（表）老太太心里向难过，觉得外甥囡娪真好，俚自家心里向难过，还要来劝我，安慰我，啥叫啥表弟么，吉人自有天相，虽然碰着强盗，作兴将来母子原会得碰头该，倷舅娘一把年纪，覅尽管伤心，自家身体要保重哦！看俚一头哭，一头劝，一面勒浪走，老太心如刀割。倘使勿是我伲子中途遇盗，什梗好格新妇，什梗贤惠格外甥勒浪我身半边，我几化福气！然而我呒拨什梗格福气，只好眼看俚走啊。而且下来，我如果得着伲子死格确切格消息，我还是要寻死路。格倷外甥囡娪今生今世勿知阿再有见面格日脚，倷是也朆晓得勒海。（白）贤甥，你去吧！
陈翠娥：喔，是！
方太太：（唱）她们甥舅依依都不舍，不送身躯只得送眼睛，
无非目送女娉婷。
（表）老太看外甥囡娪下去，人勿看见则，那么长叹一声，揩干眼泪再下去，仍旧到俚茶房间里去扇俚格茶炉子。小姐呢？一层一层下来，走到着末一层屏门背后，要想踏出来，想慢。自家晓得，刚刚替舅娘抱头大哭，总蛮狼狈勒海，形象狼狈，所以立定么，头发撸一撸光，眼泪揩一揩，裙幅整一整。不过随便倷哪哼揩，哭过格面孔总归看得出格，然后踏出屏门，再到露台浪向。丫头看见小姐来则，唷，一看格面孔哭过外！哪哼看得出么？面孔浪交格节气勒海。哪哼面孔浪么会交仔节气来则？咦，小姐架子出来么总拍点粉，一出眼泪么阿有印子格啦？一条么叫“白露”；两条么“霜降”（双杠），阿是面孔浪交仔节气则！丫头转念头覅去叫穿俚，叫穿仔小姐要窘该。别样呒啥，吃素斋要紧。因为格个四个丫头啦，平常难板跟小姐出来格——春金、夏玉、小红、绣屏。平常么小姐带采萍出来格，今朝么采萍勒屋里向陪伴俚格小姐妹陶月姑弹琵琶，所以另外带格四个丫头。格四个丫头久闻，格搭庵堂里格当家好烧手，俚格素斋烧得出色。而且刚刚一看么实头是格，当家素斋么烧好，台子浪已经摆出来则。啊，烧得浓油赤酱，看上去么总归其味无穷。格肚皮饿么，想吃仔半日则。东家勿吃么伲勿好吃格，所以要紧来催小姐。小姐吃么，伲也好吃则。
丫头：格个，小姐！
陈翠娥：嗯。
丫头：辰光勿早哉，外世素斋么摆好仔半日则，出去用素斋吧！
陈翠娥：吃不下。
丫头：吃……吃勿落啊？咳……（表）丫头想格么要命，倷么吃勿落，俚饿伤肚勒里哉。看上去还要饿一歇啦？（白）格么，吃勿落么，赛过等一歇吃阿是？
陈翠娥：到外边吩咐提轿子回府！
丫头：（表）啥？回府啊？（白）咳……嗯（表）噢喲，哪是连得呒拨吃哉！丫头怨啊，巴巴指望等仔半日，就勒勒等吃顿素斋，格个勿吃阿要呒趣相格啦？（白）格么，小姐，格么现在么齐巧乃是吃饭辰光阿是啦？肚皮饿么总要吃仔素斋勒转格，阿是啦？
陈翠娥：哪个作主啊？！
丫头：哦，是啊……（表）总归倷作主惯。一看小姐啥格面孔一板，心境勿大好勒海外，只好呒法，倷是东家！四个丫头一商量么，什梗，两个丫头到外世去提轿子，两个丫头来挽回顿素斋。两个丫头浪奔出来，嘴里勒浪喊啊。
丫头：啊，提轿子——啊，提轿子啊——
丫头：提轿子噢——（表）喊到禅堂外头么，禅堂里向有个当家坐好勒浪。当家么素斋老早端正好哉，就等倷小姐来吃则。拿仔把扇子勒浪扇光浪头。
当家：（表）咦？丫头喤朗喤朗啥体啊？啥？提轿子则？（白）嗳，姊妹们！
丫头：哦，当家。
当家：哦，阿弥陀佛。
丫头：咸，当家。
当家：嗯？
丫头：小姐提轿子要转哉！
当家：啊？小姐要回去了？
丫头：咸，照我看起来啊，替倷勿大对勒海！
当家：噢？哦……为什么？
丫头：倷想让，拣准倷素斋摆出来辰光么俚要走则，俚覅吃倷格物事！
当家：哦——
丫头：覅吃倷就是勿对！
当家：哦！
丫头：咸！俚马上就要回府。
当家：啊咦？
丫头：阿是替倷勿对勒海！
当家：（表）当家想奇怪则，我替小姐么，闲话匣讲呒拨几化，而且算得奉承俚。倷么庵东家，伲么师姑，赛过靠倷浪吃。我么匣朆得罪俚，哪哼会得要紧走呢？（白）难道当真的么？
丫头：格个有啥瞎说，倷毫稍点去留！
丫头：蛮对，留得住么还呒啥，留勿住看上去该搭庵堂里倷登勿牢则！
丫头：作兴要马上卷铺盖匣讲勒海格！
当家：（表）啊尤，格是顶怕喂，师姑走出去呒拨生路惯！别人家和尚、道士还有游方来，师姑呒拨格落！要紧踏过来一看么——果然，只看小姐懒洋洋，一百个勿起劲。边浪两个丫头扶，慢吞吞、慢吞吞浪走出来。当家想我来留留看，连忙走过来——
丫头：格个，毫稍留让，留住仔伲见倷情该！
当家：（表）哦，嗯笃见我情？勿知晓格名堂喂。（白）哦！（表）当家要紧过来，走到小姐门前——（白）阿弥陀佛！啊，小姐，贫尼问讯了，阿弥陀佛！
陈翠娥：不敢！当家，今日你办事辛苦了。
当家：噢，不见得，应当如此呀，招待不周。小姐，请用素斋吧，噢！
陈翠娥：吃不下！
当家：噢，吃不下？那么稍停再用素斋。
陈翠娥）奴要回去了！
当家：（表）实头要转去则？（白）哦，小姐！如今么，日正午时，应当用了素斋再走啊，怎能立刻回去呢？
陈翠娥：看你份上，随即回去！
当家：（表）嚯哟！格句蛮难行，我说看我面浪用仔素斋再走，俚说看倷面浪板要转去哉。格是勿看我面浪是要一记耳光拍过来快则！啥格名堂介？算算我朆得罪俚喂！当家一算么，噢！对则，今朝替小姐闲话讲得顶多是二徒弟。俚担任知客师，招待小姐，设是经格知客师浪出格毛病。咸！二徒弟太嫌会讲，呱嗒呱嗒，言多必败，勿是啥格浪得罪仔小姐则。让我来打个招呼吧！格么倷万万想勿到，俚得罪俚格舅娘勒海，倷格招呼难打。（白）呵呵，小姐！莫非为徒弟言语冲犯了小姐么？
陈翠娥：哼！令高徒好啊！
当家：呃，不好！呃，不好！（表）当家格点苗头轧得出格，格个好就是勿好则。好字浪圈仔身勒海则。（白）哦，小姐，就算小徒不好么，乃是贫尼失于训教，稍停停么待我来训斥这个劣徒。哦，看在贫尼份上还是用了素斋再走吧，噢！
陈翠娥：不必多讲！
当家：时光尚早！
陈翠娥：外边提轿子！
当家：哦，不能走！不能走！（表）一个么拦，一个么板要走。正勒浪屏僵辰光。咸，勿识相朋友来则！啥人么？二师太！二师太哪哼来格？想吃素斋格丫头一看，看格三色啦，当家六勿住小姐勒海，格么伲要吃素斋么板要留住小姐。当家六勿住么，哪哼呢？该搭庵堂里向比当家面子再大格人匣呒拨勒海，要么二师太。二师太么，知客师，嘴讲来得，要么只有俚来，拖俚来。朆晓得毛病就出勒俚身浪。去一讲么，光浪头二师太一听，噢？嗯笃小姐板要走？伲师父匣留勿住？噢，格是懂哉！看上去伲师父总勿知啥格浪得罪仔小姐，师父闯仔祸么要徒弟出场惯！勿知哪哼拨俚想出来！二师太从里向走来，俚还蛮得意勒呀！等到踏出屏门啦，因为当家勒浪拦住小姐，俚面孔朝里，看见徒弟来则。小姐面孔朝外，俚倒朆看见后头来格二师太。当家对徒弟望望，勿识相！早勿来，晚勿来，该格辰光倷来！小姐么齐巧勒浪对倷动气。所说出家人么，师父对徒弟匣是小辈，匣蛮欢喜格落！什梗吧，省得俚跑得来触霉头则！厾个招呼拨俚，让俚覅来仔吧！倘使我喤朗一喊么，小姐要晓得。所以嘴里向么，替小姐浪打招呼，而眼睛对二徒弟勒浪望，嘴巴对俚歪歪。（白）哦，贫尼该死啊！贫尼有罪啊！（表）格嘴巴浪喂。
陈翠娥：（表）小姐勿懂，哪当家师太有格嘴牵风毛病噶？哪哼格嘴一歪一歪，啥格名望呢？弄勿懂。
当家：（表）实在俚勿是嘴牵风，勒厾招呼拨徒弟。对俚望望，倷青龙角浪去，白虎头浪覅来！吃着格二师太么真勿识相，俚别样朆听见，只听见当家勒浪说，贫尼该死；贫尼有罪。噢，实头当家闯仔祸则，格么师父得罪小姐么，板要徒弟出场则。走过来么，起两个指头往准师父肩胛浪一搭。当家转念头，多谢倷哦！那么只庵堂交托拨倷！咸，师父闯祸倷徒弟出场，看倷吧！
二师太：（表）格么二师太，倷看看三色让，俚才勿关格，真正叫勿识相，走到交接门前么，（白）格个，小姐！阿是倷要转去则？辰光早勒喂，哪哼该格辰光转去呢？
陈翠娥：嗯。
二师太：中饭吃仔素斋再走，哪么贫尼么送倷转去。格老大人问起来么伲又勿会吓说格。庵堂里向么自家家庵，多登歇么白相相，阿是？老大人问起来么，伲师姑会得搭倷讲明白，该格辰光转去么，倷看太阳当顶，几化热！肚皮么亦是饿，轿子里向么，覅闷出捂痧胀来噶？阿是啦？格么吃仔素斋，师姑么陪倷转去。噢，用素斋吧！
陈翠娥：（表）嚯，小姐火喔！看见格势利师姑就恨！啥格道理？刚刚得罪我舅娘，说我舅娘么青肚皮猢狲教勿灵，说我舅娘么像干瘪蟑螂，才是倷说惯！哦，现在么勒浪咒我则。啥叫啥倷早勒海介，等到吃仔中饭勒转去。太阳头里逼逼么要氽痧。噢，倷么咒我氽痧啊？而且我转去俚还要送来！咦，又勿是出棺材格，要嗯笃送！啥叫啥伲爷埋怨我么俚去添好话，倷有多大格面子？小姐越想越恨！其实骨子格两句倒匣勿是丘话呀，蛮好落，呶！勿对仔啊，句句勿好格。趁我格心，拍脱俚两记。一者，小姐从来朆打歇人；再者，勒浪庵里向烧香打师姑，传扬出去难听。不过倷得罪我舅娘我顶恨，吓吓俚！所以面孔一板，眉毛一竖勒眼睛一弹，加官指头一起。（白）奴要回府，谁敢拦阻！
二师太：（表）二师太还朆看苗头勒呀！（白）呵呵，辰光早来，倷哪哼做得出格……
陈翠娥：还不与我……
二师太：留下来吃素斋！
陈翠娥：走！
二师太：噢，格个！（表）阿要吓格啦！小姐慈糯糯，从来朆什梗光火歇过。俏眉毛一竖，俏眼睛一弹，还不与我走！指头指一指么，二师太一吓。一吓么，啊呀！啊呀么，只嘴巴张得太大，倒说格下巴格榫头脱脱则，下巴落下来则。（白）啊呀，那么要死哉！（表）为仔俚太嫌会讲勒，下巴匣吓脱。要紧退到边浪，一只手光浪头浪一揿；一只手下巴浪一托，浪装下巴。
陈翠娥：（表）格个辰光小姐匣勿去看格势利师姑。轿子打到里向，小姐老虎入洞之势上轿。不过浪当家面浪招呼一声，说道今朝办事辛苦，我要紧走则。当家匣晓得留勿住则。呒拨办法则，带仔小师姑，拿仔香，相送小姐。轿子着肩，抬到外头。
（唱）势利不堪恶尼僧，单与当家谢一声。
轿子出山门，
（表）轿子出山门。等到轿子到外头么，小姐想着。啊呀，庵里向格舅娘，格两个师姑原朆晓得喂！勿晓得是我舅娘原要吃苦头啊，老太婆长，老太婆短。什梗，我来拿当家喊俚出来关照两句。
（唱）扶手轻轻扣几声，
（表）等到一拍扶手，轿班笃喊，格个阿姐妹子，慢慢叫上轿，小姐还有闲话噢！
丫头：噢！
（唱）四青衣婢子向东君。
（白）小姐，阿有啥事体啊？
陈翠娥：把当家叫来！
丫头：噢，喊当家来阿是，噢！（表）丫头退过来，倒说看见格当家象格吓呆松鼠什梗，叫啥南无仔格手，呆瞪瞪勒里。格个丫头啊，索加要骗物事吃哉。（白）当家！
当家：噢！
丫头：格个，今朝伲小姐为啥动气马上走倷阿晓得啊？
当家：是啊，为了什么我至今还没有知道。
丫头：勿晓得啊？
当家：嗯。
丫头：哼，才是为倷一句闲话说坏哉！
当家：怎见得为贫尼呢？
丫头：啥叫啥倷小姐坐定么，师姑执壶敬酒勒，侍侯小姐，阿是倷讲格？
当家：是啊！
丫头：就是为格两句闲话出格毛病！
当家：（表）咦？格两句朆错喂！（白）怎见得？
丫头：因为伲小姐有个暗毛病格！
当家：什么毛病？
丫头：叫“老虫夹”。
当家：（表）勿懂！（白）什么意思？
丫头：该仔人啊，吃勿落物事该！
当家：噢？
丫头：俚么欢喜一个子，登勒房里向，“听听踏踏”什梗吃法该！那么倷勒浪说，要侍侯小姐勒，执壶敬酒勒，小姐阿要光火格啦？格个素斋铜钿么是我自家惯！啥噶？倷算碍住我啊？勿许我吃啊？那么俚要提轿子勒走则！
当家：（表）当家想，有格种事体噶？阿是御史千金有格种“老虫夹”格毛病噶？（白）要怎样才好呢？
丫头：呶，什梗！倷等歇拿桌素斋送到城里来！
当家：噢！
丫头：咸！让小姐一个子关紧仔门吃格一个畅么，俚就见倷格情么就勿会动气则落。等歇素斋送得来！
当家：噢——（表）当家一听么有数目则，素斋送得来是勿是小姐吃格，挑倷吃格！格个丫头还勒浪掉勿落顿素斋，真要命！（白）噢，小姐唤我前去？
丫头：那么现在小姐喊倷去，有闲话搭倷讲。
当家：噢——（表）当家连忙拿仔炷香，走到小姐轿子边浪向。（白）啊，小姐，贫尼在此，有何吩咐？
陈翠娥：（表）小姐想替倷细细叫讲，勿是一歇歇讲得定，我匣心急勒里，让我闲话说得简单点吧！勿晓得讲张倷勿好简单格格简单啦，字也叠勒一堆去则。说倒当家，我顶轿子飞什梗飞进城，俚格人跌什梗跌进来。我有桩天大地大格事体要紧回到屋里告诉老娘家，拨一下片子，送格人到衙门里办死一个人！说完么倒说扶手板浪一碰——（白）走，走，走！
轿班：啊——宛啊！（表）嚯落落落……轿子去哉！
当家：（表）当家吓呆！实在小姐格意思，俚勒浪恨王本，要办王本。单单说要办死个人，指头一指么，齐巧对仔格光郎头。当家阿要吓格啦，看上去办死我啊？我么一庵之主，徒弟闯祸，总归寻着我！唉，想想三百六十行才好做，终覅做师姑，赛过做别人家出气筒。今朝小姐来么又朆得罪俚，哈呀！猫跳勒死人身浪，啥格大事体哉。看小姐轿子走么，呒拨办法喂！剩下来点佣人，拿烧下来点香烛、元宝、钱粮挑转去。当家回进来，庵门关一关，到禅堂里向坐定。香，香炉里插一插好。一看么，格个宝贝徒弟，下巴装好则，登勒格边浪呆脱。咸，今朝格祸么才是倷闯格！勿知啥格路道，喊俚过来——（白）来！
二师太：来！
当家：我叫你来么来！
二师太：我喊倷过来么过来！
当家：难道唤你不动？
二师太：啊？啥叫啥唤勿动介？咦，人么有人名字，猫么有猫名字惯！
当家：（表）俚格名字叫映月。（白）映月，过来！
二师太：过来么过来好则喂！
当家：（表）噢喲，赛过犟小倌什梗一个！（白）你好噢！
二师太：倷好噢！
当家：（表）格个徒弟真呒拨规矩。（白）难道为师不好？
二师太：才是倷勿好喂！
当家：啊？怎见得？
二师太：倷想让，才是去留仔个老太婆进来留出格事体喂！因为嗯笃朆到三层楼去格辰光，小姐待我来得格好！二太长，二太短。才是拿格老太婆带到三层楼勿知讲点啥格名堂，回下来么光火，拿我下巴匣戳脱，阿是倷师父害我格？
当家：你呀，为人之道，全都不懂！
二师太：勿懂么倷要教我惯！
当家：（表）教倷倷勿知阿听喂！（白）一个人做人么——
（唱）叫闭口深藏舌，
二师太：有仔舌头总要说！
当家：（表）嗯？犟拔嘴！
（唱）叫安身处世牢，
二师太：勿翻跟头，勿豁虎跳，立得蛮牢桩！
当家：（唱）岂知是朽木不可雕。
二师太：呀，朽木雕是勿好雕，灶膛里烧是可以烧惯！
当家：（表）唷，烧胚！
（唱）千喂千答缘何意，
二师太：格是我格脾气！
当家：（唱）自信聪明一味刁。
二师太：师父啊，刁么我勿刁，呶，骄么有点该！
当家：（表）噢，倷倒也晓得噶？
（唱）富绅的千金非泛泛，
二师太：啊？陈家里格千金勿是泛泛么，哪哼道理啊？呒拨道理喂，千金么哪哼介？
当家：（唱）她胸中的怒气不能消。
二师太：噢，消勿能消么，吃两包药下去么，包倷肝气通就消脱则喂！
当家：（表）真是犟拔嘴！（白）你可晓得小姐她生气，回到府中告诉陈老大人！（表）陈老大人光起火来是还了得格啦？伲格只庵堂是俚笃家庵，勿是十方之处格庵堂，哪么好，五个光郎头，狮子滚绣球，统统滚出去！（白）统统要赶出去！
二师太：啊？要赶出去噶？
当家：咸！
二师太：格么师父，天地良心，我么朆得罪格，阿是，倷到城里向去问问清爽，覅冤枉好人！
（唱）今朝多谢倷恩师父，且向城中走一遭，
负荆请罪女多娇。
（白）倷去问问看，啥人得罪，啥人去赔罪！哪怕赶出庵堂，总归勿怨该！
当家：我不去！
二师太：去去吧！
当家：你闯的祸与我何干？我是不去！
二师太：噢喲，倷么赛过象爷娘一样惯！
当家：不去！
二师太：一庵之主呀！
当家：也不去！
二师太：倷去吧！
当家：不要你拍马屁！
二师太：巴望倷百年长寿！
当家：不去！
二师太：巴望倷千年勿死！
当家：（表）老猢狲喂！（白）啊？
二师太：老寿星！
当家：也不去！
二师太：阿是真格勿去啊？
当家：不去！
二师太：蛮好！勿去么哉！我匣勿怕该！
当家：（表）师姑打仔穷结，象吃讲茶什梗。（白）做什么？
二师太：咸！作兴老大人要拿伲赶出庵堂，或者拿伲抓到堂浪去问么，我才会得讲惯！伲么覅得罪格，得罪么是伲师父要得罪！
当家：哦——不能讲的啊！
二师太：我要说惯，我才咬死倷喂！嘿嘿，要赶么一道赶出去，叫“咯落栖，一道死”！
当家：（表）拖人落水，拿俚呒哪哼！（白）好好好，我到城中去见小姐，你在庵堂中看守门户，千万不要再去冒犯这位老娘娘！
二师太：噢！
（表）哪么当家进城，婆媳相会告一段落。