越剧《卖草囤》 剧本唱词

卖草囤 裘锡仁、曾水土等口述
选自:《落地唱书》/张继舜搜集整理，浙江文艺出版社，1992年3月
（表）嵊县山青林密，景色秀丽。格天，在秋山道上，走出一个小伙子，他是鹅毛扁担两头翘，一对草囤肩上挑，一边走，一边唱，来得开心。
（曲）“东桐岭来西桐岭，
桐岭山上有座坟，
四圈松树密层层，
坟当中央出枝藤，
藤缠松来松缠藤，
缠来缠去缠勿清，
一缠两缠缠到伢格碰头碰脑格彭家村。
讲起伢格彭家村，
人家只有十八份，
墙弄倒有廿四根，
还有三十六具孤老坟。
十月芙蓉小阳春，
里厢走出我乡下人，
我是百家姓上头一姓，
讲起上代蛮有名，
伢太太太太太太公就是宋朝开国皇帝赵匡胤。
常言道，富在深山有远亲，
穷在街头呒人问。
呒有牌头难煞人，
只得种田落地为根本。
伢村里有班空手人，
取名道姓真是乱弹琴——
取伢阿爸南山头顶老寿星，
取伢阿姆毛什脑头倒生根，
取伢阿姐是妲已狐狸精，
取伢阿妹是刁刘氏来还魂。
对我取名越加狠，
一取取起下面十七八个细碎名：
大门灯笼亮锃锃，
半天炉灰混沌沌，
放过炮仗呒处寻，
拔断萝卜勿生根，
倒挂一根钿串绳，
覆转钱板尽干净，
拔勿出格铁锈钉，
脱勿出格锄头砧，
烊掉蜡烛剩根芯，
烧过柴头乌沉沉，
麦田坑里老鼠精，
深山冷岙猢狲精，
料池蛤蟆修成精，
大山窠里蚱蜢精，
掏破番薯苦伶仃，
泡过茶叶光光清，
田螺壳里牵胡琴，
夜壶里头竖蜻蜓，
格种名字多难听，
通通来咚调排人。
伢拉姆妈蛮上心，
专请瞎子算过命，
排八字来排时辰，
取我名字赵阿根。
屋里穷得罪过人，
风扫地来月当灯，
自家田地呒半分，
只有茔田两亩零，
当中还坐起三头石板坟，
实在勿到亩七分。
阿爸叫我种早青，
姆妈叫我种晚青，
我从小有些硬头颈，
种起外国刚刚行来格麻雀青。
三月初三正清明，
秧田做得坦妥平，
谷籽撒落黄如金，
几日工夫勿去认，
秧苗出起毛三寸。
青丛丛，丛丛青，
稻草芯，吊头颈，
拔起秧来筅帚形。
秧苗挑到田坎登，
抛呀抛在田中心。
插起秧来行行正，
灰料壅得格外勤，
三遍戽来四遍耘，
稻头矗起尺把兴，
再过半月勿去认，
稻头弯落像拗罾，
请拢几个割稻人，
“屯里蓬”，“蓬里屯”，
割归晒好一把称，
燥谷倒有九百斤。
阿爸坐起三百棺材本，
姆妈坐起三百烧香银，
谷子只剩三百斤，
本想给我做老婆本，
排排起来还是肚皮顶要紧，
心中想想多烦闷。
我到田畈走一阵，
东看看来西忖忖，
只见稻草晒得像白藤，
实足有我一人兴。
忙拿草杠和柴绳，
挑起稻草转家门，
喊来一个小倌人，
站呀站咚稻草顶，
提起铁扎（搭）捏好柄，
“着啦”“着啦”理干净，
随手拿出小榔头，
“定令蓬”，“蓬令定”，
敲得像格苎麻筋，
再拿一个小竹棍，
“嘁哩嚓啦”做草囤。
我做草囤蛮细心，
根根统用稻草芯，
密密打进毛竹钉，
圈圈扎得紧又紧，
外面再用箬壳绕一层，
别人只有十五、十六层，
我有十七、十八、十九层。
摆在地下坦妥平，
小人坐咚蛮蛮稳。
远看看，还道是个聚宝盆，
近看看，是赵家屋里小草囤。
今朝天气也和暖，
挑起草囤就动身。
但愿卖个好行情，
我噔噔噔噔把路行。
卖草囤呀卖草囤——
唉！喊来喊去呒人应。”
（白）“晤！店堂里格金字招牌挂咚店门口，我格招牌挂咚哪里呢？还是挂咚嘴巴里厢，让我讲些好话给伊拉听一听——”
（唱）“众位朋友听分明，
我格草囤有名声：
小倌人坐我小草囤，
快长快大蛮聪明，
读书赶考求功名，
头名状元稳笃定。
小姑娘坐我小草囤，
会长会大蛮齐整，
描龙绣凤样样能，
状元采去做夫人。
——啊！我好话讲到介光景，
倷倒一个呒人应，
呒有半点生意经。
对，乡下草囤多得紧，
还是挑到城里卖草囤。
‘阵咚阵咚’把路行，
一走走到老东门。
卖草囤呀卖草囤，
喊来喊去又是呒人应。
唷！前面围着一班人，
哩哩哇哇讲新闻，
格种新闻我蛮要听，
待我歇落格担小草囤，
打开两扇耳朵门，
走上前去听分明。
——哦，原来是两人身穿学生装，
来啦讲明、清两代多少皇：
明朝太祖朱元璋，
称号洪武坐殿堂，
建文、永乐、洪熙皇，
宣德、正统、景泰皇，
天顺、成化、弘治皇，
后来出个正德皇，
正德是个风流皇，
游龙戏凤到处逛，
寻花问柳走四方。
嘉靖、隆庆、万历皇、
再加泰昌、天启皇，
崇祯是个末代皇，
吊煞煤山见阎王，
日月并行落山岗。
后来清朝势力旺，
一根辫子悬空荡，
清朝总共十代皇，
顺治、康熙、雍正皇，
乾隆、嘉庆搭道光，
咸丰、同治、光绪皇，
宣统是个末代皇，
总共勿到三年皇。
孙中山，兴起一班革命党，
三民主义日日讲，
拆掉庙宇造学堂，
提倡妇女把脚放，
剃头师傅站门岗，
大小辫子统割光。
嵊县东乡出个竺绍康，
别人喊伊牛大王，
西乡有个董郎岗，
金发龙头本姓王，
统暗底参加革命党。
为招兵买马买刀枪，
王金发，三百田地都卖光，
后到绍兴坐府堂。
都督朱瑞勿是人，
枪杀金发一命亡。
石磺有个钱家坑，
独眼阿标有名望，
结拜兄弟四个人，
文高、道卫、张和尚。
暗地兴起革命党，
招兵买马走四方。
团总保兴来得横，
跑到县里请关防，
派出统领刘庆林，
阿标一点勿着慌。
请来一班仙居人，
屯在白竹大祠堂，
两头兵马‘腾令砰’，
一夜打到大天亮。
打得统领见阎王，
吓得县长呒处藏，
城里百姓都逃光，
山里头人受惊慌，
有得谷米呒处放，
山高头顶打地坑，
晦气倻班新昌人，
‘娘格隆咚’番薯六谷都食光！
——唉！格种新闻勿好听，
‘盎啷别’，关起两扇耳朵门。
挑起两只小草囤，
噔噔噔噔路来行。
一走走到老南门，
门边坐着两个老年人，
胡须拖落介些兴，
咿哩哇啦讲新闻，
侬道讲起啥新闻？
来啦讲，北伐军打北洋兵。
格辰光，北伐军末叫南兵，
北洋军阀叫北兵，
南兵打过黄岩海门镇，
一心要去攻杭城；
北佬拔到会墅岭，
战壕机枪摆端正。
蒋介石，保护自家顶上心，
南兵拔到奉化溪口镇，
打杭州要过关岭顶，
北兵守得实实紧。
南兵师长俞丹屏，
北佬师长周永城，
南兵拔到黄婆亭，
北佬摆起一字长蛇阵，
威风凛凛要吃人。
南兵突然来个蟹钳阵，
两头合拢打一阵，
‘腾令砰’，‘砰令腾’，
弹子好像发流星，
哇啦哇啦喊声像雷震。
南兵打仗有本领，
打煞北佬千把人。
北佬一退退到新昌城，
害得县长逃到山背顶，
先是番薯六谷当点心，
后就抓鸡、抓鸭、吊狗、杀牛又要欺待老百姓。
北佬一退退到嵊县城，
县长逃到两头门，
城里百姓逃干净，
财主逃到崇仁镇，
县里商会会长汪正金，
看见北佬几千人，
跪记倒来就恳情，
大洋讲到八千零，
连得米店袋头背干净，
送出北佬到西兴。
——唉！格种新闻我勿要听，
‘盎啷别’关起两扇耳朵门。
肩上挑起两只小草囤，
我噔噔噔噔路来行。
一走走到西城门，
碰着两个小后生，
‘嘀哩哆噜’讲新闻，
我歇落两只小草囤，
打开两只耳朵门，
待我再去听一听。
侬道讲起啥新闻？
来亨讲日本鬼子打杭城，
小钢炮摆咚半山根，
‘通通通’炮弹打塌艮山门，
当场打煞好些人，
城里霎时乱纷纷，
老老小小统逃命：
老太公，逃得发起气喘病，
后生人，冲散家小呒处寻。
留春院里姑娘也有名，
个个生得蛮齐整，
胭脂搽得红津津，
水粉搨得白喷喷，
高跟皮鞋毛三寸，
高头梳得像盏清油灯，
听得日本鬼子要归城，
胸口扑扑跳不停，
吓得汗毛抖楞楞，
虱虮抖得尽干净，
要想上天呒有路，
要想入地也呒门，
只得躲到茅坑里面去藏身。
还有两个年迈人，
听到‘腾砰’起枪声，
吓得透出小活灵，
东躲西藏心勿宁，
也往茅坑里面来跑进。
双方对牢一记认，
看见姑娘介齐整，
惊得眼睛发了昏，
认为是个活观音，
跪记倒来就恳情：
‘唉，救苦救难观世音，
保佑日本赤佬勿要进城！’
姑娘被伊弄得神勿清，
忙问：‘日本鬼子可有进城门？’
老太婆，讲话像扯破布筋，
话话城来像话门，
话话门末要话城，
讲来讲去讲勿清；
姑娘以为已归城，
披头散发隔江去逃命。
日本兵，一见花姑娘真开心，
咿哩哇啦喊勿停。
杭州地方勿要蹲，
一拔拔到西兴镇。
西兴灯笼也有名，
东挂西挂密层层，
日本人见了吃一惊，
以为菩萨来咚显威灵。
西兴地方勿敢蹲，
一拔拔到萧山城。
萧山咸鱼也有名，
街上摆得满腾腾，
日本人，侬一串来我一捆，
街上咸鱼拎干净。
萧山地方又勿蹲，
一拔拔到柯桥镇。
柯桥香干也有名，
小巧结实香喷喷，
日本人，侬也争来我也争，
柯桥香干呒得剩！
柯桥地方又勿蹲，
一拔拔到绍兴城。
绍兴老酒也有名，
香又香来醇又醇，
日本人，个个喝得红津津，
绍兴老酒被倻喝干净。
绍兴地方又勿蹲，
一拔拔到东关镇。
东关蒲鞋也有名，
牢又牢来轻又轻，
日本人拎得（一）双（一）介人，
东关蒲鞋呒得剩。
东关地方勿要蹲，
一拔拔到蒿坝镇。
蒿坝蚊虫也有名，
大号蚊虫像飞艇，
中号蚊虫像老鹰，
小号蚊虫好像黄岩大蜻蜓，
格班蚊虫凶得很，
上勿叮来下勿叮，
专叮日本人格后身跟，
‘啊呀，中国人真大大的狠，
专到背后来谋命，
这个地方鬼得很！’
篙坝地方勿敢蹲，
一拔拔到曹娥镇。
日本人，发起里瘴病，
嗒嗒嗒，四日两头抖楞楞，
三条被盖咚还不行，
以为曹娥娘娘显威灵。
曹娥地方勿敢蹲，
一拔拔到嵊县城，
看看嵊县是个挂山城，
听听山里头三五支队势力盛，
想想有些汗毛凛，
连夜拔到诸暨交界中峪岭。
诸暨佬，勇得很，
勿管‘十’本人来‘廿’本人，
百廿斤格铁流星，
二百斤格生铜棍，
长柄大刀三百斤，
‘呜啦呜啦’还会开四门。
檀树大炮摆端正，
炮炮都是要伤命，
弹子屁眼有根柄，
吓得日本人眼睛白瞪瞪。
眼泪水实足出了三茶瓶，
‘嘀哩笃落’氽咚脚背顶，
倻做鬼也弄勿清，
哪晓得，炮里打出都是雨靴钉。
——唉！格种闲话勿再听，
各人各有生意经，
‘盎啷别’，关起两扇耳朵门。
挑起两只小草囤，
一走走到北门城，
喏，碰着两个看牛人，
高高骑在牛背顶，
‘丁丁冬冬’讲新闻。
倻话道，秋香庵里勿正经，
偷偷摸摸生小人，
要做经课难养人，
要养小人难念经，
弄得实在呒法门，
采来采去来咚采草囤。
嚯！格种新闻顶要听，
格是帮我荐来生意经。
我何必在此多留停，
还是赶去卖草囤。
三脚并作两步行，
秋香店就在前面存。”
（白）“嗄！勿走勿到，一走就到。哎，庵堂里是拜佛念经，只有买买蒲墩，勿好公开卖草囤咯！对，我还是喊得含糊一点：‘卖蒲墩呵——草囤，囤！卖蒲墩呵——草囤囤，囤！’晤，待我歇落来吸盅烟再讲。”
（白）“走呀！”
（唱）“贫尼从小运勿顺，
常有病魔来缠身，
阿爸当我是珠宝，
姆妈当我掌上珍。
特请江湖算命人，
替我排八字来算时辰。
伊瞎三话四伤我心，
讲我是阴差阳错八败命。
若要一生呒关忌，
除非削发做尼僧。
爹娘听得瞎子话，
害我鸟入樊笼进空门。
我却不肯尼姑做，
算是带发来修行。
我与表哥王有生，
青梅竹马情义琛。
姑爹姑妈勿答应，
讲我命里犯克星。
表哥还是喜欢我，
偷偷摸摸两成亲。
谁知生下一小人，
暗暗养在云房门，
托人去把奶娘寻，
日后再好母子认。
忽听店外有喊声，
一口清来一口混。
响的喊着卖蒲墩，
轻的减着卖草囤。
店中缺少大蒲墩，
也急需买个小草囤。
我今勿走前山门，
轻轻打开后山门。
我手招招来脚顿顿，
喂！侬拉阿哥快进门。”
（白）“嚯！观音菩萨在上，受弟子一拜，保佑伢四季平安，五谷丰登。”
（白）“啐！我勿是观音，我是凡人！”
（白）“喔，侬是犯人，介是侬要杀头坐牢咯！”
（白）“勿对呀！”
（白）“喔，是棺材呀，棺材好盛死人咯！”
（白）“啐！勿是。我是凡间格人！”
（白）“噢，侬是饭篮穿根绳，介弄勿好也要吊煞人咯！”
（白）“哪里？我是伢阿爸姆妈生出来格人啦！”
（白）“哪格话？侬是料池蛤蟆修起来格精呀，介是要谋人咯！吓猛，吓猛！”
（白）“啐，勿是。我是伢阿爸姆妈两介头生出来格人啦！”
（白）“噢，是人呀！介倷阿爸姆妈勿差嗒，把侬生得介齐整啦！唷——”’
（唱）“侬头上青丝像乌云，
弯弯眉毛如画成，
画眉眼睛水灵灵，
玉雕鼻子悬胆形，
樱桃小口笑盈盈，
糯米牙齿多匀称，
勿长勿矮好身形，
我道是，观音菩萨下凡尘！”
（白）“勿要取笑！”
（白）“噢！我有数哉，侬一定是十来月生咯！”
（白）“唔，哪格会给侬猜着？”
（白）“格是灯笼壳外望蜡烛头——明见明亮咯！”
（白）“是啥道理？”
（白）“喏，十来月生末，是正二月生归咯！格辰光，倷阿爸姆妈穿得暖火火，餐餐油罗罗，食得顶勿错，格辰光生格小人格外有力，限板齐整。像伢格种人一定是上半年生咯！”
（白）“为啥？”
（白）“格辰光五荒六月，青黄勿接，伢阿爸姆妈喝格薄粥汤，过格苋菜梗，顶多霉千张，肚皮瘪亨亨，脚骨酸汪汪，格辰光生格小人还会有力？限板同我一样，像岩头猢狲介一只。喂！倷阿爸老子有勿有来亨？”
（白）“去年过世了。”
（白）“啊！可惜呀可惜！天下别人都好死，只有倷阿伯死勿得，如话来嗒，喊伊帮我生记过，我格岩头猢狲也有侬介齐整哉！”
（白）“啐！生好格人，钉煞格秤，哪会好变呢？”
（白）“噢！给侬讲起来，格是呒有办法咯！好，闲话撸起，侬叫我进庵，是要买草囤吗？”
（白）“伢庵堂里是吃素念佛修行咯，只要买蒲墩。侬勿是在外面在喊卖蒲墩么？”
（白）“唉！我是爹娘生得勿乖，每日起早摸夜，走路磕头跪拜，昨日运气不好，连头跌倒七跤，衣服换得七套，水塘蘸得断燥，昨夜晚头将黄昏晓来亨当天亮晓，出门时暗漆漆，错把草囤当蒲墩挑来哉！”
（白）“原来如此！”
（白）“喔，尼姑哎！”
（白）“啐！尼姑——尼姑是别人背后喊喊咯！”
（白）“尼姑！尼姑！尼姑！”
（白）“啐！侬作啥啦？”
（白）“侬叫我到背后喊嘛！”
（白）“哎，勿是！譬如我走到街坊，我末走过去哉，人家讲：喏，格是尼姑呢？”‘
（白）“噢，格样子背后喊呀！介末当面哪格喊呢？”
（白）“当面要喊师太！”
（白）“喔，撕破——撕得多少破啦？”
（白）“啐！师太。”
（白）“好，师太就师太。介末侬草囤到究要勿要买？”
（白）“这——要是要咯；不过，侬勿要传扬出去。”
（白）“介好咯，只要侬草囤买嗒，我末归去买张膏药嘴巴‘着啦’贴咚，一定勿去露风。”
（白）“格勿算，侬要对天罚咒过，我才放心。”
（白）“介好咯！我草囤卖啦庵里厢，如到外面去谈讲，给伊头发冰冰冷，牙齿石石硬，脚掌屯屯肿，耳朵两面生。”
（白）“啐！格勿算咯！”
（白）“哪格罚罚好，介末侬教我。”
（白）“好，你听了——”
（唱）“值日功曹在上听，
弟子名叫某某人，
秋香庵里卖草囤，
若到外面去谈论，
东北角，起乌云，
西南角，扯雷云，
两头兜拢拗桥云，
蓬隆咚，——
（插白：喔唷，慢点，慢点！）
（插白：做啥！）
（插白：给我张张看，山门有勿有倒来咚？）
（插白：啐！是教侬罚咒呀！）
（插白：我道“蓬隆咚”是山门倒咚哉！）
（插白：啐！）
打煞侬格乡下人。”
（白）“好，介有数哉！”
（白）”快罚呀！”
（白）“好！”
（唱）“值日功曹在上听，
弟子名叫调皮精——
（插白：啊？调皮精？）
（插白：勿是！姚唯真。）
秋香庵里卖草囤，
若到外面去谈论，
东北角，扯乌云，
西南角，有雷云，
两头兜拢‘蓬隆咚’，
打破一个大坟墩！”
（白）“好，随我来！”
（白）“好！”
（表）那尼姑格辰光一想之后，忽然回转身来把后山门关上。侬道卖草囤人哪格讲？
（唱）“唉！勿作兴来勿作兴，
侬还话吃素在修行，
看见我格后生人，
相貌生得呒批评，
青天白日关男人，
实在是个拖人精！”
（白）“侬要死快哉！我哪里来看相侬？”
（白）“介侬山门关起来做啥？”
（白）“在伢庵堂里卖草囤是私下卖卖咯！”
（白）“啊？侬给我好省哉！别人家卖草囤是私卖，伢赵家人向来是官卖咯。”
（白）“为啥？”
（白）“嘿！大炮打城里，庵堂点琉璃，烂泥糊地皮，敝灰粉墙壁，破布垫鞋底，讲出闲话未有道理。伢赵家为啥是官卖呢？那年仔伢阿爸草囤挑到县堂门口，刚好出来一个大辣茄———”
（白）“哪里？一定是大老爷。”
（白）“对，是大老爷。伊看看草囤来得好，随手买归去！给小辣茄坐咚。”
（白）“啐！是小老爷。”
（白）“唔，是小老爷。后来伊大大起来又是大老爷介长，大老爷介大。大老爷一高兴末，就赐伢赵家人世世代代卖草囤，所以，伢赵家是官卖咯！”
（白）“勿要缠七缠八。我是讲在伢庵堂里卖草囤是私卖咯。”
（白）“介末私卖就私卖。”
（白）“好！随我来！”
（白）“喔——”
（唱）“我挑起两只小草囤，
夹脚屁股路来行，
对面站着一尊神，
我假痴假呆问一问。
师太请侬停一停，
问侬格个是啥人？
伊头戴高帽摇零零，
上面打起十七八个破脑楔，
看看像个种田人，
身穿蓑衣亮晶晶，
浑身发起火泡疗，
手里捏根锄头柄，
顿末顿在脚背顶，
褪落锄头呒处寻，
脸孔有些黄澄澄，
眼眼厢是看尼僧，
大概看侬介齐整，
来咚发格相思病。
（插白：啐！）
噢！介末定是侬格当家人，
倷昨夜晚头相骂寻，
难怪伊独自站嗒道地顶，
眼睛脱出像铜铃，
嘴巴翘得好挂酱油瓶，
常言道，一夜夫妻百夜恩，
自家人何必介认真，
我给倷做个和事人，
侬还是把伊来喊进，
省得伊姟啦格里摆钝劲。”
（白）“啐——”
（唱）“伊哪里是个种田人？
也勿是我格当家人，
侬污秽神道罪过人，
格是韦驮菩萨管山门。”
（白）“喔，是韦驮？是有围把大咚——”
（唱）“实在是我勿懂进，
跪记倒来赔小心，
菩萨你呀莫怪我，
只因我从来呒有进山门。”
（白）“侬呀——”
（唱）“下遍说话要小心，
触犯菩萨罪勿轻！”
（白）“哎——”
（唱）“反正家里穷见筋，
菩萨等辈我勿信。
唷！请侬师太停一停，
喏，格里坐着一个小官人，
头皮有些光溜溜，
额角好像木鱼形，
眯着眼睛笑盈盈，
悬胆鼻子生得正，
耳朵拖到肩胛顶，
嘴巴坼到腮帮跟，
两只奶奶起奶饼，
肚皮有些饱顿顿，
肚脐眼末凹嗒进，
左脚钩来右脚伸，
手里捏颗算盘芯，
算来算去算勿清。
一张脸面黄沉沉，
像发四日两头病，
大概侬讲闲话伊勿听，
害侬师太火来临：
非但勿给伊请医生，
连衣衫也勿给伊穿一身。
还罚伊坐在石板顶，
侬自生小人介勿亲，
连我对伊也同情，
师太为啥心介狠？”
（白）“啐！——”
（唱）“侬又要瞎三话四乱弹琴，
格是个，眯眯祖师②在管二山门。”
（白）“噢——”
（唱）“师太勿要怒气生，
实在是我勿知情，
喏，眯眯祖师还是笑盈盈，
伊倒也勿怪我乡下人。”
（白）“快来！”
（白）“来哉！——”
（唱）“三脚两步大殿进，
东摆木鱼西摆磬，
大小菩萨两边分，
如来佛祖坐中心。”
（白）“唷，师太。倷格里是男庵堂还是女庵堂？”
（白）“庵堂末当然是女的！”
（白）“侬勿要骗我乡下头人，女庵堂哪会有介许多男和尚？”（白）“唉！那是十八罗汉。”
（白）“噢，是十八罗汉。师太，倷庵堂里来嗒开店格？”（白）“又说笑话了。庵堂里还会开店呢？”
（白）“哎，勿开店，倷屋柱里挂介许多招牌做啥？”。
（白）“啐！哪里是招牌！格是对联。”
（白）“噢，还是对联。介我也会读咯！”
（白）“侬倒把格副对联读读看——”
（白）“好——对字对得好，联字联勿牢。”
（白）“不对！格是七字句呢。”
（白）“噢，介是我少两个字啦。唔，七字句我也会读。喏，——兴哄兴哄又兴哄，哄兴哄兴又哄兴。”
（白）“勿对咯！”
（白）“噢，介末再来过。——贱卖牛肉出天台，盛在东阳蒲包袋。”
（白）“瞎扯！”
（白）“介侬话哪格读呢？”
（白）“紫竹林中观自在，白莲台上见如来。”
（白）“喔！差勿多咯！我是特为试试侬啦！我看格副对联勿好，要改过。”
（白）“哪格改？”
（白）“上一联：徒子徒孙进庵堂；下一联：吃鱼吃肉偷和尚。”
（白）“啐！伢是勿作兴咯！”
（白）“格有啥勿作兴呢？勿是来东话：犬搭狗，门配臼，伴当找丫头，尼姑和尚轧饼头。”
（白）“啐！侬又要瞎三话四，伢是勿作兴咯！”
（白）“格个也勿作兴末，倷小尼姑哪里来呢？”
（白）“伢是买来咯！”
（白）“买来总是自生好，亲也好亲点。喔唷，师太，倷今日办多少酒？”
（白）“伢勿办酒！”
（白）“勿办酒？为啥蒸笼脱连地摊啦？”
（白）“啐！格是摆咚咯蒲墩呢！”
（白）“哪格话？侬勿要在关老爷面前戏薄刀花，蒲墩我会勿认得呀？”
（白）“是勿认得——”
（唱）“乡下头人勿懂进，
伢是蒲墩外面套布身，
一朵莲花绣中心，
大红小呢来镶滚。”
（白）“哪格话？有个小人囥咚蒲墩里，格是要闷煞咯！快把伊抱出来。”
（白）“啐！我是讲，蒲墩外面用大红小呢镶滚过啦！”
（白）“噢，介是我眼睛花咚哉！哎，师太，倷庵堂里吃素还是吃荤啦？”
（白）“当然是吃素啰”
（唱）“请侬抬头看分明，
六角方方六头门，
上面六根小柴绳，
当中吊个冻肉甑，
怕得猫猫来偷腥，
挂呀挂职到楼板跟。
乡下头人穷得很，
呒钱难进肉店门，
请侬师太开开恩，
少些给点我开开荤。”
（白）“啐！格哪里是冻肉甑头，是一盏灯！”
（白）“是灯？啥格灯啦？”
（白）“侬倒猜猜看？”
（白）“格勿是吹牛皮，勿猜末歇，一猜末限板就猜着。”
（白）“好！侬猜。”
（白）“格是癞子头皮倒头称？”
（白）“勿是！”
（白）“介末麻雀歇咚晾竿顶？”
（白）“勿是！”
（白）“猫猫跳到灶头顶？”
（白）“勿是！”
（白）“老鼠跳到米甏顶？”
（白）“勿是！”
（白）“夜壶拎到灶头顶？”
（白）“勿是！”
（白）“介末团里卜落西瓜灯？”
（白）“勿是！”
（白）“轿夫拎拎格水库灯？”
（白）“勿是！”
（白）“团团会转格走马灯？”
（白）“勿是！”
（白）“介末一品当朝灯？”
（白）“勿是！”
（白）“二龙枪珠灯？”
（白）“勿是！”
（白）“三战吕布灯？”
（白）“勿是！”
（白）“四季发财灯？”
（白）“勿是！”
（白）“五子登科灯？”
（白）“勿是！”
（白）“六六顺风灯？”
（白）“勿是！”
（白）“七子团圆灯？”
（白）“勿是！”
（白）“八仙道海灯？”
（白）“勿是！”
（白）“九龙治水灯？”
（白）“勿是！”
（白）“十全如意灯？”
（白）“通通勿是！”
（白）“噢！介末我有数哉——”
（唱）“孙村杜山白泥墩？
（插白：勿是！）
富润范村箬帽墩？
（插白：勿是！）
独秀山边狐岭墩？
（插白：勿是！）
浦口多仁无底墩？
（插白：勿是！）
独山大山箬岭墩？
（插白：勿是！）
谢姆石板头泥塘墩？
（插白：勿是！）
茶坊五都墩头村？
（插白：勿是！）
胡村桥边宋家墩？”
（白）“越加勿对哉！”
（白）“介算我猜勿着。还是侬话话出来好哉！”
（唱）“侬吹吹牛皮样样能，
连格盏灯呀勿知情，
念佛太太多虔诚，
助拢来点起格盏琉璃灯。”
（白）“哦，是琉璃灯呀！介末我头句就猜着啦。”
（白）“啐，侬又讲造话！”
（白）“哈哈！我从来勿讲造话。伢乡下头人讲话有个规矩咯。”
（白）“啥个规矩？”
（白）“看见麻皮喊伊满天星，看见疯子喊伊琉璃灯。头句勿是‘癞子头皮倒头称’？格就是猜琉璃灯嘛。唉，我被侬调排去哉！喔唷师太，侬还话勿开店，喏，帐簿也来嗒格里呢？”
（白）“格勿是帐簿。”
（白）“介末是啥东西呢？”
（白）“侬倒再猜猜看！”
（白）“好！摆咚格里勿是帐簿，限板是经，是勿是新经？”
（白）“勿是！”
（白）“介末旧经？”
（白）“只有心经，哪有旧经？”
（白）“有新必有旧嘛！”
（白）“都勿是。”
（白）“介未三官经？”
（白）“勿是！”
（白）“六官经？”
（白）“只有三官经，哪有六官经？”
（白）“都勿是！”
（白）“介末高皇经？”
（白）“勿是！”
（白）“低皇经？”
（白）“只有高皇经，哪有低皇经？”
（白）“哎，有高必有低，有天必有地，有粗必有细嘛！”
（白）“都勿是！”
（白）“介末一定是弥大经？”
（白）“勿是！”
（白）“弥小经？”
（白）“只有弥陀经，哪有弥小经？”
（白）“有大人末就有小人，有弥大经末总有弥小经啰！”
（白）“通通勿是。”
（白）“哎！介是我猜勿着啦，还是侬话话出来好哉！”
（白）“格勿是经本，是一本代历。”
（白）“哦，原来是本老皇历。唔，蜘蛛绷是有嗒！讲起皇历末我蛮晓得嗒：正月初三初四回飨节，初五初六上八里，正月十三杨公忌，清明来嗒三月里，立夏来嗒四月里，五月五，是端午，六月六，狗洗浴，七月半，做兰盆，八月半，大团圆，重阳来嗒九月九，冬至来嗒年外头……。”
（白）“嗳！冬至限板来咚年里，勿是来咚话，冬至勿出年外嘛！”
（白）“勿是！往年冬至在年里头，今年给我‘着啦’一脚头，一脚踢到年外头。”
（白）“嘿，我看侬瞎编乱话，大概书也呒有读过。”
（白）“哈哈！我书会呒有读过？侬呀真是有眼勿识鸡蛋！”
（白）“哼！有眼勿识泰山。”
（白）“对，侬是有眼勿识泰山！我非但拜过孔夫子，还拜过两个老夫子。”
（白）“嚯，真看侬勿出！”
（白）“我肚皮又勿是自鸣钟，几点几刻，一眼看出。伢头个先生教伢读三字经，一日到夜念‘人之初，性本善，性相近，习相远，苟不教，性乃迁，教之道，贵以专……’过了个把月，还是教三字经，我老早厌弃哉。有日仔，我也教同学念啦——”
（白）“啊？你读了一个月就会教书，勿知侬哪格教教？”
（白）“侬听咚，我介样子教咯——‘人之初，性本善，先生教伢钓黄膳；性相近，习相远，原几句书读勿完；苟不教，性乃迁，若还呒有新书见；教之道，贵以专，再读落去也枉然！’我一念两念，被先生晓得啦。先生把我喊去，脸孔一板，骂啦。‘唔！侬花头介多，三字经背来，如话背勿出，打侬四十板手底。’我讲：‘先生。顺背还是倒背啦？’”
（白）“背书哪有倒背的？”
（白）“我顺背落，倒背转，一口气就背完，连螺蛳也勿嗍一颗。先生一听，呒话讲。又问：‘赵阿根，侬三字经勿要读，要读啥？’我讲要读两字经。”
（白）“只有三字经，哪有两字经？”
（白）“唷！侬与伢先生讲话倒是同喉咙嗒，伢先生也是像侬介讲咯。”
（白）“介末侬哪格话呢？”
（白）“我话，先生，三字经忒讨厌，减去当中一个字，喏！人初，性善，性近，习远，苟教？性迁，教道、贵专……格勿是变两字经啦？伢先生气末气煞，但一时也呒有办法。再讲伢先生是猫猫转世咯！”
（白）“侬又胡说八道啦！”
（白）“格是真咯，勿是猫猫转世，为啥伊餐餐要食鱼呢？有日仔挨着伢待饭，晏快刚好伢娘舅来哉，呒有酒菜，伢姆妈就把鱼给娘舅食了半边，翻了个面又去请先生。伢先生限板先喝老洒咯！老酒一喝好，半边鱼就光啦，筷一笃，唔，气得连饭也勿吃，拿起笔就题了首诗。”
（白）“哪格题题？”
（白）“先生题：‘瑟兮闲兮，赫兮峘兮，鱼肉吃去，剩把蓖箕。’先生走后，我也题了一首。”
（白）“侬哪格题题？”
（白）“我题：‘如切如磋，如琢如磨，餐餐要过，哪有介多？’先生晓得后，气得铺盖一卷，就打道回府哉！”
（白）“介末后来哪格弄弄呢？”
（白）“后来伢请来一个先生，格先生讲起来真有趣哉！”
（白）“啥介有趣？”
（唱）“讲起来是桩好新闻，
伊勿长勿矮胖墩墩，
金丝眼镜挂鼻顶，
来时还背着三头门。”
（白）“嗳！——”
（唱）侬又来咚乱弹琴，
格先生哪会介有劲？
何况伊是教学生，
何必要带三头门？”
（白）“格侬就勿懂啦——”
（唱）“灯芯勿拨灯勿明，
伊是一个杭州人，
开口我们你们和他们，
我问侬，加拢是勿是三头门？”
（白）“哎呀，格是人家杭州人讲杭州话嘛！”
（白）“对！格位杭州先生还专门教伢学百家姓咧，日日厢是赵钱孙李，周吴郑王，冯陈褚卫，蒋沈韩杨，……呒有多少日子，我又顺背倒背，通通会背。有日仔我又来亨教学生……”
（白）“侬哪格教？”
（白）“我讲：赵钱孙李，先生偷米。哪侬听见？聋子听见；哪侬看见？瞎子看见；哪侬追着？跷脚追着；哪侬抓牢？独手抓牢；哪侬讲出？哑子讲出。后来一传两传，给伢先生晓得哉。先生把我喊去，眼睛一白，桌子一拍，嘿！侬油腔滑调，花头勿少，手伸过来！”
（白）“哦，要打手底板哉！”
（白）“我连忙讲：‘先生，我，我百家姓非但顺背倒背会背，连讲也大部分会讲嗒哉！’先生一听会奇怪煞，就要我讲啦。”
（白）“侬哪亨讲讲？”
（白）“我讲：有一个人，姓赵名钱，字孙李，伊头皮像畚斗，狮子大鼻头，眉毛像钢针，眼睛像铜铃，丈二平顶，阔口撩牙，手像蒲扇，脚长两尺，胸有三围，伊本来来啦当将军咯，因奸臣当朝，辞官勿做，回家务农，格勿
是一般务农——”
（白）“啥格农？”
（白）“郏浦尚农。伊种起一块田，格块田勿是沙田，也勿是泥田——”
（白）“啥格田？”
（白）高夏蔡田。格年仔年成来得差，先是发阵风，再落霜和雪。格阵风，勿是旋风，也勿是龙风——”
（白）“啥格风？”
（白）“甄麯家封。格霜勿是夏天六月霜，也勿是冬天大浓霜——”
（白）“啥格霜？”
（白）“胥能苍双。格雪勿是小雪，也勿是大雪——”
（白）“啥格雪？”
（白）“费廉岑薛。格一来，介大一丘田只结了三颗谷——”
（白）“啊？只有三颗谷！是啥格谷？”
（白）“—颗拓拔夹谷，一颗江童颜郭，一颗牧隗山谷。介一来伊田勿要种，种了一爿地。格爿勿是沙地，也勿是泥地——”
（白）“啥格地？”
（白）“闻莘党翟。伊种得爿姜，勿是嫩姜，也勿是老姜——”
（白）“啥格姜？”
（白）“金魏陶姜。格年仔姜年成倒蛮好，出得崭齐，交关像样。哪晓得有两个小人前来看羊——”
（白）“哪两个？”
（白）“一个是戚谢邹喻，一个是柏水窦章。一共牵来四只羊，格羊勿是山羊，也勿是绵羊——”
（白）“是啥格羊？”
（白）“一只尉迟公羊，一只上官欧阳，一只宗政濮阳，一只蒋沈韩杨。起头放在温别庄晏，后来羊逃到姜地里吃姜，姜被吃得七零八落，老赵肚皮气饱，连忙挑料去浇，总算出得还好。哪晓得连头三日三夜大雨，害得何吕施张，姜被氽坏哉！气得老赵包裹上肩，雨伞上前，出去做生意哉。走到东郭南门，碰到一位要好朋友——”
（白）“啥人？”
（白）“姓冯，名陈，字褚卫。老冯问老赵到哪里去？老赵话想到外面做点生意。老冯话，好！我跟侬一道去。两人一走两走，来到一个小村——”
（白）“啥地方？”
（白）“米其明臧。又碰着一个朋友，伊是做贼咯，大家喊伊包诸左石。包诸话，倷两位快到伢家里坐坐，连忙喊伊娘出来，格娘勿是伊生娘，也勿是伊养娘——”
（白）“啥格娘？”
（白）“全郗班仰。伊娘就动手烧晏饭，到里面拿出一只箩来，勿是升箩，也勿是淘箩——”
（白）“啥格箩？”
（白）游竺权逯。伊连忙去量米，侬道啥格米？勿是早米，也勿是晚米——”
（白）“啥格米？”
（白）曾毋沙乜。伊娘一看，柴已烧完，随手拿来一根銃，勿是竹銃，也勿是木銃——”
（白）“啥格銃？”
（白）“柴瞿阎充。勿晓得格銃烧起来火头忒猛，烧得饭镬下底乌焦巴弓，上面樊胡凌霍，饭半生勿熟。包诸话：饭勿好末，伢下饭菜体面点好啦！伊娘捧出四盘一汤，调羹一双——”
（白）“哪四个盘头？”
（白）“一盘肠，一盘肚，一盘鸡，一盘鲞。格盘肠勿是猪肠，也勿是牛肠——”
（白）“啥格肠？”
（白）“郝邬安常。一盘肚，勿是狗肚，也勿是马肚——”
（白）“啥格肚？”
（白）“姬申扶堵。一盘鸡，勿是雄鸡，也勿是草鸡——”
（白）“啥格鸡？”
（白）“边扈燕冀。一盘鲞，勿是白鲞，也勿是鳓鲞——”
（白）“啥格鲞？”
（白）“巢关蒯相。还有一碗汤，勿是紫菜汤，也勿是肉丝汤——”
（白）“啥格汤？”
（白）“雷贺尼汤。刚要喝酒、吃饭，忽然闯进一个人。啥人？伊叫赫连皇甫。伊话：众位兄弟，大事勿好，已有三路反王起兵造反——”
（白）“哪三个反王？”
（白）“一个是周吴郑王，一个是顾孟平黄，一个是姚邵湛汪。老赵讲：吃酒事小，保国要紧。包诸忙帮助伊全身披挂起来，伊头戴梅盛林刁，穿起宁仇栾暴，脚着朱秦尤许，并牵出一头马来，格勿是赤兔马，也勿是白龙马——”
（白）“啥格马？”
（白）鲁韦昌马。但手里呒有兵器，见门口刚好有株檀树，老赵用手一拔，斩头去尾，做起一根谈宋茅庞，老赵就策马而去，老冯一见，也勿披挂，只穿上酆鲍史唐，骑上万俟司马，但格头马肚皮饿啦，跑勿动，连忙饲糠给伊吃，格糠勿是早谷糠，也勿是晚谷糠——”
（白）“啥格糠？”
（白）皮下齐康。熊纪舒屈，吃得蛮饱。伊手里呒有兵器，就带上一枝笔。勿是大字笔，也勿是小字笔——”
（白）“啥格笔？”
（白）“滕殷罗毕。老赵老冯一冲两冲，对面刚好碰着周吴郑王，老赵就冲上去和伊大战起来，一打两打，打到项祝董梁，周吴郑王吃勿消了，就开始败退，一退两退，退到井段富巫，后来，退勿过去哉，就回过头来，逃进一个庙——”
（白）“啥格庙？”
（白）经房裘缪。周吴郑王是会变化咯，伊就变化出两只熊来，勿是狗头熊，也勿是马头熊——”
（白）“啥格熊？”
（白）“一只叫晁句敖融，一只叫长孙慕容。格两只熊张牙舞爪，来得厉害，老赵只有招架之功，并无还击之力。老冯一见，连忙拿起滕殷罗毕，伊是有法术，会画符咒咯——”
（白）“画起啥格符？”
（白）“轩辕令狐。符咒一烧落，马上化出两条龙来——”
（白）“哪两条龙？”
（白）“一条叫景詹束龙，一条叫蔚越夔隆。两只熊一见两条龙，吓得魂不附体，不到三个回合，就被龙一一抓住。龙嘴一张，就把熊吞得司徒司空。我格样把百家姓一讲，先生也像瞎子看花灯，哪会弄得清！先生话：‘唔，也有点道理。不过，你孑格好造我偷米？还是不能饶你。来，手伸得直点儿！”啪啪打了四十板手底，我痛得眼泪水直氽，心想，总有一日要掏梢咯！……哎呀师太！讲讲又笑笑，日头往西朝，辰光勿早了，我归去路有勿少！草囤快买——”
（白）“多少铜钿一只？”
（白）“三百钢钿一只，全部买咚末，给侬便宜些，算六百铜钿一双。”
（白）“格勿是一样吗？忒贵！”
（白）“嗳！工夫花掉半天，侬倒还要嫌贬！好，勿要末歇落，我挑到外面去喊哉！卖——”
（白）“喂，轻点，勿要喊！好，我买，我买。喏，我买格一只。”
（白）“独只头我勿卖咯！”
（白）“为啥？”
（白）“侬一只买去，我哪格挑桃？勿是要背起来哉！侬都买买咚好啦，反正侬总要生添咯！”
（白）“啐！”
（白）“侬如话勿要，介我又要喊哉！卖——”
（白）“好，我买！我买！”
（白）“侬老早是好买哉。侬独个人用勿掉末也好借给师阿姐、师阿妹去用用嘛。”
（白）“啐！侬又瞎三话四。喏，给侬铜钿。”
（白）“格遭勿够啦！”
（白）“要多少？”
（白）“要四百铜钿一只，八百铜钿一双。”
（白）“为啥？”
（白）“伢赵家卖草囤有规矩咯，歇落来就要加一百铜钿一只。”
（白）“介末……”
（白）“侬到究要勿要？勿要末歇掉。让我挑起来再喊——”
（白）“好！我买，我买！喏，给侬铜钿。”
（白）“忒多啦！”
（白）“勿是要八百一双吗？”
（白）“伢乡下头人是硬来硬到底，麦出勿食米，做人蛮爽气，开口话三百一只，一对就是六百。”
（白）“格刚才侬——”
（白）“我是食麦碎饭游西湖，来嗒寻开心啦！”
（白）“啐！侬真是个调皮精！”
（白）“对！我是越穷越开心！好，再会！”
（白）“慢走，走好！”
（白）“好，再会！——喔唷唷！今朝亏得运气好，差点跌—跤。”
（白）“格叫勿听好人言，吃苦在眼前，我勿是叫侬走好吗？”
（白）“还话走好走好，是侬害我吃跌咯！”
（白）“啊？还是我缘故？”
（白）“喏，被侬对头一眼瞧，我格活灵全烊掉，喊我还会站得牢？”
（白）“啐！又是胡说八道。”
（白）“喔！还好，还好！亏得绊了一跤，差点大事忘掉。”
（白）“啥格大事？”
（白）“我想和侬订个合同！”
（白）“啥格合同？”
（白）“喏，师太，倷庵堂里如话歇日再要草囤，就包给我。只要侬带个口信，我哪怕乌风猛暴，勿管天落薄刀，一定随叫随到。”
（白）“啐！侬——侬倒是会寻开心嗒！嘻嘻。”
（白）“哈哈！”