梁汉威是个腔口好又有韵味嘅老倌

粤剧老倌唱嘢,要字正腔圆,要有发口,腔口有韵味,噉就会越听越好听,嗒落有味嘞。

梁汉威就系个腔口好有韵味嘅老倌。佢十三岁入行,先后曾跟随新马师曾、梁醒波、陈锦棠等名伶学艺,积数十年嘅演出经验,令佢精通锣鼓同音乐。2003年,佢应香港中乐团邀请,演出交响乐伴奏粵曲《屈原》,得到香港戏迷嘅赞赏。近年佢演出咗好多新戏,包括有《剌秦》、《天之骄子》,同埋创新戏曲音乐剧《珍珠衫》,《风流梦——小明星传奇》等。

梁汉威多才多艺,重系个勤奋嘅老倌,佢唔单止做戏,重自己设计唱腔。梁汉威话:“以前啲老倌都要请人为自己度身定做唱腔嘅,依家我自己度唱腔,更加能发挥自己嘅优点,更能扬长避短,唱起嚟更得心应手嘞。”佢对唱腔同粤曲嘅研究,一做就做咗近廿年,有好多好作品面世。近几年佢有一首唱得大热嘅《烽火碎亲情》,里边有好多靓腔戏迷都钟意听嘅。

好似呢支曲嘅开头,佢扮嘅康熙出场,先唱一句北上小楼:“大漠天威,破蒙御征上阵前!”再唸四句英雄白:“王赫斯怒震长天,不容边患扰中原；且喜康熙人尚健,一战平蒙捷报传。”急转古曲《将军令》:“伏寇万里灭狂焰,靖世自信能代天；恩被四海,早惯征战,保得八方靖,九州岛月永圆。愿永享国祚绵,梦也甜!”咁样一听起嚟就觉得好有威势。接落嚟嘅二簧慢板:“穹庐帐,暂作军辕；大功告成,未敢偷闲犹自勉。”佢喺最后“自勉”两个字后边拖咗个腔就好有味道。

但凡识唱嘢老倌,口钳好靓,够露字,唱滚花一定系好听嘅,梁汉威都唔例外。佢嘅高音唔系好靓,但系中音好浑厚,佢就根据自己特点设计唱腔,音域多数喺中音范围,佢唱得舒服,观众就听得舒服嘞。好似呢段二簧滚花:“忽听帐前蒙妇哭,哀哀切切动心弦。战乱每添小民冤,待朕稍加慰劝。”呢几句滚花,无高腔,但梁汉威唱得韵味十足,发口好靓,真系越嗒越有味。