粤剧如何能一举多得

前两日睇咗新闻先至知道，原来粤剧喺粤西地区几受欢迎啵。粤西地区喺新春期间有个独特嘅传统节日叫“年例”，比春节仲重要，所以广州几个粤剧戏班呢排特登去化州、茂名、湛江等市镇嘅村落演出，受到热烈欢迎。

见到市场空间越来越小嘅粤剧喺嗰边咁红实在令人觉得欣慰，但原来其中却有不为人知嘅辛酸内幕—由于演出经费不菲，加埋官方演出少咗好多，到呢啲地区演出嘅粤剧团好多都係爱好曲艺嘅热心老板请来嘅，即係话，冇咗呢啲热心老板，呢啲粤剧团就冇咁多工开了。

如果你得闲去人民公园、越秀公园等老城区嘅公共休闲活动场所转下，会发现经常有粤剧爱好者喺度排戏或听戏，粤剧氛围好似几浓下，但不争嘅事实係，中意粤剧嘅年轻人越来越少。我出来做嘢十年，年轻共事者无数，只遇到一个中意粤剧嘅同事。可以话，粤剧传承已经出现断层。

难得粤西地区嘅群众咁中意睇粤剧，粤剧嘅普及发展也因此见到曙光，却受困于经费不足而困难重重，实在令人唏嘘，呢个时候如果有政府出面俾啲政策和经费支持就好了。比如发达地区喺对口帮扶贫困地区嘅时候，将粤剧纳入精神文化建设项目之内，咁样嘅话，粤剧得到普及与发展，戏班有工开有钱赚，贫困地区群众嘅精神生活又得到满足，而政绩又有了，可谓一举四得了。