青春花旦曾小敏

凡系过年，各个剧团都会做春班，由年前嘅年廿几，一路做晒成个正月。广东粤剧院青年团，今年春班好旺台，各乡镇争住请佢哋做大戏，因为钟意青年人充满朝气嘅表演，曾小敏就系一个青春活力嘅花旦。

曾小敏，三水人，广东粤剧院青年团花旦。佢能文能武，扮相俊美，表演细腻传神，唱腔委婉，嗓音圆润，曾荣获广东省第二届戏剧演艺大赛金奖、第三届广东省戏剧演艺大赛金奖、全国“红梅杯”演唱大赛“红梅大奖”等，攞奖无数。曾主演剧目有：《白蛇传》、《女儿香》、《三跪九叩寒江关》、《刘金定斩四门》、《投江》等。

曾小敏年轻亮丽，佢充分发挥自己嘅特点，多演武打戏。睇佢做武场戏，一招一式非常到位，无论系《刘金定斩四门》嘅大开打，定系《白蛇传》嘅赛反身，重有《投江》入边嘅级翻，呢啲高难度嘅动作，佢都做得潇洒漂亮，干净利落令人大声叫好。呢啲就系青年演员嘅优势，佢地能够做好多中年老倌都做唔到嘅武场戏，为古老嘅传统艺术，增添咗一抹青春亮丽嘅色彩。

　唔好以为曾小敏剩系识做武场戏，其实，做文戏甚至系青衣戏，佢都做得好好架。戏迷都知道，经典名曲《潞安洲》，系用传统青衣行当表演嘅，青衣戏要求演出淡定、稳重，呢个对好多年轻演员嚟讲，有一定难度。我曾经喺一个粤剧演艺大赛，睇曾小敏做《潞安洲》，佢做嘅夫人深沉凝重，眼神有戏，再加上用形体、水袖等动作配合人物表演。唱到(滚花)：“惊间此语热泪盈眸，节烈之身何堪蒙垢，君有龙泉三尺，请斩妻头。”嘅时候，佢情绪激动，泪如雨下。接落嚟一字一句咁讲口白：“将君呀，与其受辱于胡虏，不若死在君前罢，君呀！”真系字字血、声声泪，催人泪下。

　戏迷都话：青春花旦曾小敏，前途无可限量！