岑海雁“粤韵飘香”

人地话：“戏如其人”。粤剧花旦上台表演，各有各嘅风格，乜性格就演乜戏。有啲声如黃莺，有啲娇俏动人，有啲婀娜多姿，有啲落落大方。岑海雁就系一个表演大方嘅花旦。

岑海雁，1984年喺广东粤剧学校毕业，佢基本功扎实、潜质优厚，天资聪慧、扮相亮丽，演唱风格柔婉清新。曾主演过《柳毅传书》、《闹严府》等名剧。亦领衔主演过《穆桂英大破天门阵》、《珍珠塔》、《何文秀》、《黛玉葬花》等数十个长、短剧目。佢多次随团赴美国、加拿大、新加坡、香港、澳门等国家同地区演出，深受海内外观众嘅欢迎。

喺神话粤剧《柳毅传书》入边，佢演嘅龙女三娘表演好细致。上半场嘅龙女，嫁夫不良，惨遭迫害，被迫在寒天雪地放羊。呢场戏，出场挥羊鞭嘅几下身段动作，佢演得弱不禁风楚楚可怜，虽然羊系虚拟嘅，但表演可以畀人信服：有一群羊，因风大雪冷唔愿行，要用鞭嚟赶，重有只小羊羔行唔倒上坡，要抱佢上嚟。呢啲动作都要有生活和艺术美，呢段动作戏，岑海雁表演得好投入真实。接落嚟，当见到书生柳毅时，佢饱受折磨嘅眼中露出希望嘅光芒，佢用眼神表达咗对柳毅嘅感激，柳毅愿意传书，改变咗龙女嘅命运。

演到尾场“花好月圆”嘅时候，龙女系调皮幸福嘅，佢幻变成渔女，要同自己嘅恩人洞房嘞。柳毅觉得佢好似龙女，但又唔敢讲，呢个时候龙女就专登激佢：“我未遗忘市上村姑竟传言，争相说你入过京都去求名，不料未进场就折转……京都应试何奇遇？夫君呀你是否有一段未了缘？”迫柳毅讲出同龙女嘅奇遇。呢段戏，岑海雁用咗俏步、转身、敬酒等动作嚟令柳毅惊讶，又用偷窥、窃笑嚟表现龙女嘅可爱，到最后，揭开真相，柳毅好开心，有情人终成眷属，花好月圆，最后呢段戏，岑海雁用落落大方嘅表演，演好咗一出经典好戏。